Rossiya Mudofaa vazirligi vakili Konashenkovning uyi haqidagi ma’lumotlar maxfiylashtirildi

Davlat ro‘yxatidan o‘tkazish, kadastr va kartografiya federal xizmati (Rosreyestr) Rossiya Mudofaa vazirligining rasmiy vakili, general-leytenant, har kuni Rossiyaning Ukrainaga qarshi urushidagi harbiy harakatlar kursi borasida rasmiy hisobotlarni taqdim etuvchi Igor Konashenkovga tegishli bo‘lgan kvartiraning egasi haqidagi ma’lumotlarni o‘chirib tashladi. 7 noyabr, dushanba kuni The Insider internet-nashri va "Mojyem ob’yasnit" Telegram kanali Rosreyestr ma’lumotlar bazasidagi o‘zgarishlarga e’tibor qaratdi.

Gap Moskvadagi «Smolenskaya» metro bekati va Arbat ko‘chasi yaqinida joylashgan Rujyeyniy ko‘chasidagi «Smolenskaya Zastava» elit turar joy majmuasidagi 96 metrli kvartira haqida ketyapti. Avvalroq, ko‘chmas mulk Delivery Club xizmati ma’lumotlar bazasida mijozlar ma’lumotlarining sizib chiqishi tufayli jurnalistlarning e’tiborini tortgandi - generalning qizi Arina ushbu manzilga bir necha bor ovqat buyurtma qilgani ma’lum bo‘ldi.

Rosreyestrdan olingan ko‘chirmaga ko‘ra, 2015 yildan buyon ushbu manzildagi kvartira «Rossiya Federatsiyasi»ga tegishli - aniqrog‘i, ikki xil «Rossiya Federatsiyasi» ikkita umumiy mulkdor sifatida belgilangan. Surishtiruvchilar kvartiraning maydoni to‘g‘risidagi ma’lumotlarni Konashenkovning o‘zi 2015 yildan beri deklaratsiyasida ko‘rsatgan ma’lumotlar bilan solishtirdi, ular davlat tizimidan olingan ko‘chirma bilan to‘liq mos keladi. Mudofaa vazirligi matbuot kotibining deklaratsiyalarida manzil ko‘rsatilmagan, biroq uning qizi bilan birga kvartira egasi ekanligi qayd etilgan.

Jurnalistlar general Konashenkovning kvartirasi narxini 70-90 million rublga baholamoqda va uni sotib olishdan oldin u bir yil davomida rasman bor-yo‘g‘i 4,1 million rubl ishlab topganini ta’kidlamoqda. Uy-joyning o‘zi, 2015 yilda mulkchilik o‘zgarishidan oldin, Rossiya Mudofaa vazirligining «Mulk munosabatlari bo‘yicha maxsus hududiy boshqarmasi» nazorati ostida bo‘lgan.

Iyun oyi oxirida «Proyekt» nashri Igor Konashenkov bir necha bor Ukrainaning bir xil aholi punktlari egallab olingani va qurolli kuchlar ixtiyoridagidan ko‘ra ko‘proq texnika va odamlarning yo‘q qilingani haqida xabar berganiga e’tibor qaratgandi.

Shunday qilib, Konashenkov Luhanskdan 95 km shimoli-g‘arbda joylashgan Kremennaya shahrini qo‘lga kiritilganini to‘rt marta e’lon qildi, generalning so‘zlariga ko‘ra, Bayraktar dronlari yozda Turkiyadan Ukrainaga rasmiy ravishda yetkazib berilganidan ikki barobar ko‘proq yo‘q qilingan. Vazirlik hisobotlaridagi sezilarli nomuvofiqliklarga qaramay, Rossiya prezidenti Vladimir Putin iyun oyida Igor Konashenkovga general-leytenant unvonini berdi.

Noyabr oyi boshida Rosreyestr Ukrainadagi Rossiya qo‘shinlari guruhining yangi qo‘mondoni general Sergey Surovikin oilasining ko‘chmas mulki haqidagi ma’lumotlarni yashirgani ma’lum bo‘ldi. Bu generalning mulki bo‘yicha tergov e’lon qilinganidan ko‘p o‘tmay sodir bo‘ldi, unga ko‘ra Surovikinlar oilasi 126 million rubldan ortiq ko‘chmas mulkka ega.

Bungacha rossiyalik muxolifatchi Aleksey Navalniy jamoasi Rossiya mudofaa vaziri o‘rinbosari Ruslan Tsalikovning oilasi 4,3 milliard rubllik ko‘chmas mulkka ega ekanligini aniqlagan edi. Ushbu obektlarning bir qismining egasi «Rossiya Federatsiyasi» deb ko‘rsatilgan.

Xuddi shu ma’lumotlar bir vaqtning o‘zida bir nechta FXX zobitlari egalarining ismlari o‘rniga paydo bo‘la boshladi, Navalniy jamoasi ularni muxolifatchi ustidan josuslik va uning zaharlanishiga aloqadorlikda gumon qilyapti. Bundan oldin Rosreyestr Davlat dumasi deputati Valentina Tereshkovaning ko‘chmas mulki haqidagi ma’lumotlarni yashirgandi, u 2020 yil mart oyida Rossiya Konstitutsiyasiga Putinning prezidentlik muddatini «bekor qiluvchi» o‘zgartirish kiritishni taklif qilgan.