iPhone o‘g‘rilaridan himoyalanishning yangi usuli ishlab chiqilmoqda

9to5Mac ma’lumotlariga ko‘ra, yangi funksiya ko‘cha o‘g‘irliklari sonining ko‘payishi sababli foydalanuvchilarni himoya qilishga qaratilgan. Odatda bunday hollarda smartfon egasining qo‘lidan tortib olinadi va qurilma qulflanmagan holda qoladi.

Tizim bir vaqtning o‘zida bir nechta parametrlarni tahlil qiladi. Ehtimoliy o‘g‘irlikni aniqlash uchun iPhone akselerometr va harakatni kuzatuvchi boshqa sensorlardan foydalanishi mumkin. Agar algoritm qurilma qo‘l bilan tortib olinganini aniqlasa, smartfon avtomatik ravishda qulflanadi.

Bundan tashqari, Apple ishlab chiqayotgan xavfsizlik funksiyasi juftlashtirilgan Apple Watch soatidan masofani ham hisobga oladi. Agar iPhone to‘satdan egasidan uzoqlashsa, bu himoya tizimini ham ishga tushirishi mumkin.

O‘g‘irlikdan himoya qilishning yangi tizimi boshqa omillarni ham tahlil qilishi mumkin: tanish Wi-Fi tarmoqlariga ulanish, qurilmaning joylashuvi — masalan, foydalanuvchining uyi yoki ishi. Agar smartfon notanish joyda bo‘lsa va bir vaqtning o‘zida bir nechta o‘g‘irlik belgilari aniqlansa, iPhone qurilmani avtomatik ravishda bloklaydi va ma’lumotlarga kirishni cheklaydi.

Kirish huquqini qayta tiklash uchun egasi parolni kiritishi kerak bo‘ladi.

Apple allaqachon Find My, Activation Lock va Stolen Device Protection kabi xavfsizlik vositalaridan foydalanib kelmoqda. Yangi funksiya smartfon hali qulflanmagan bo‘lsa, himoyani kuchaytirish uchun mo‘ljallangan.