Марс учун пойга ҳал қилувчи паллага кирмоқда. Дунёдаги авиация, космик ва ҳарбий техникани энг йирик ишлаб чиқарувчиларидан бири – Boeing корпорацияси бош директорининг фикрича, унинг компанияси NASA аэрофазовий агентлигига яратишда ёрдам бераётган мегаракета астронавтларни Қизил сайёрага олиб боради ва буни миллиардер ҳамда SpaceX компанияси эгаси Илон Маск ваъда қилганидан аввалроқ амалга оширади.
CNBC янгиликлар нашри журналистининг ким, унинг фикрича, Марсга одамларни биринчи бўлиб олиб боради - Boeing ёки SpaceX’ми, деган саволига Boeing раҳбари Деннис Муленбург ўз компаниясига ишониши билан жавоб қайтарди.
«Эртами ёки кечми, инсоният Марсга барибир боради. Ҳамда менинг ишончим комилки, Қизил сайёрага қадам қўядиган биринчи одам, у ерга Boeing компанияси ракетаси ёрдамида олиб борилади», - дея маълум қилди Муленбург.
Эслатиб ўтиш жоизки, Boeing NASA’нинг жуда йирик ракета-ташувчиси Space Launch System’нинг биринчи поғонасини ишлаб чиқиш бўйича вазифа топширилган асосий пудратчи ҳисобланади. Ракетани узоқ коинотга космик миссияларни етказиш, шунингдек астронавтларни Қуёш тизимининг бошқа сайёраларига «Орион» янги космик қурилмаси ёрдамида олиб бориш учун асосий ракета-ташувчи сифатида қўллаш режалаштирилмоқда. Boeing’дан ташқари, лойиҳада United Launch Alliance, Orbital ATK ва Aerojet Rocketdyne сингари компаниялар ҳам пудратчи саналади. NASA аэрофазовий агентлиги яқин келажакда Ойнинг ёнида «Deep Space Gateway» орбитал станциясини қуришни режалаштирмоқда, у бошқа сайёралар, жумладан Марсга ҳам йўлда ўзига хос ўтиш нуқтасига айланади. Агентлик айнан шу ерда SLS ракета-ташувчисини «Орион» космик қурилмаси билан биргаликда ишлатишни режалаштирмоқда, унинг ёрдамида одамлар Қизил сайёрага етказилади. SLS’нинг биринчи синов парвози 2019 йилга мўлжалланган.
Шу билан бирга, SpaceX раҳбари Илон Маск узоқ вақтдан бери Марсда колонияни қандай қилиб қуриш ҳақида бош қотирмоқда. Бунинг учун янги ракета талаб этилади, Маск ҳозир айнан уни ишлаб чиқиш билан шуғулланмоқда. Ўта оғир ракета Big Falcon Rocket, ёки BFR деб номланади ҳамда одамларни Марс, Ой ва бошқа йўналишларга жўнатиш учун ишлатилади. Бундан ташқари, SpaceX келаси йилнинг январида Falcon Heavy оғир классдаги янги ракетани биринчи марта парвозга чиқаришни режалаштирмоқда. Ўтган ҳафтада Маск янги ракета бортида биринчи синов парвози доирасида коинотга ўзининг электр спорткари Tesla Roadster’ни чиқаришни мўлжаллаётгани ҳақида маълум қилди, унда Дэвид Боуининг «Space Oddity» қўшиғи янграйди. Йўналиш? Марс орбитаси.
Албатта, Муленбургнинг баёнотидан сўнг Маск индамай туриши мумкин эмасди. У «Твиттер»да қисқа, бироқ қўрс изоҳ қолдирди: «Хўп, бошланглар».
Boeing’дагилар эса бунга жавобан чақириқни қабул қилишлари ҳақида маълум қилишди ва ўша ижтимоий тармоқдаги ўз саҳифаларида: «Ўйин бошланди», деб ёзишди.
