Тадқиқотларга кўра, дунё миқёсида уй-жой нархлари кескин ошган. Бу борадаги энг катта ўсиш Туркияда қайд этилиб, 32 фоизни ташкил қилган.
Бутун дунё бўйлаб уй-жой нархлари ошиб бормоқда. 56та мамлакатда Knight Frank томонидан ўртача нархларни таққослаш натижасида олиб борилган тадқиқотларга кўра, ўтган йилнинг март ойидан жорий йилнинг март ойигача уй-жой нархлари ўртача 7,3 фоизга қимматлашган.
Туркия кетма-кет бешинчи чоракда нархларнинг йиллик ўсиши рейтингида етакчилик қилмоқда. Мамлакатда ҳисоботда кўрсатилган давр мобайнида уй-жой нархлари 32 фоизга ошган. Туркиядан ташқари биринчи ўнликдан асосан ривожланган давлатлар, жумладан, Янги Зеландия (22,1 фоиз), АҚШ (13,2 фоиз), Швеция (13 фоиз), Австрия (12,3 фоиз) ва Норвегия (10,9 фоиз) ўрин олган.
Россияда бу кўрсаткич 11,1 фоизни ташкил этган.
Шу билан бир қаторда, баъзи бир йирик иқтисодиётлар, хусусан, Ҳиндистон (-1,6 фоиз) ва Испания (-1,8 фоиз)да кўчмас мулк нархлари арзонлашган.
Ўзбекистонда бу борада вазият қандай?
Иқтисодий таҳлилчи ва мустақил эксперт Игор Цой томонидан олиб борилган тадқиқотларга кўра, 2021 йил май ойида Тошкентдаги квартира секторида (иккиламчи бозор) уй-жойларнинг ўртача етказиб бериш нархи квадрат метр учун 717 долларга етган (ойлик ўсиш суръати 2,1 фоиз). Бир йиллик ўсиш эса долларда ҳисоблаганда 9,3 фоиздан иборат бўлган. Бу рақамлар сўмда кўрсатилганда, бир йиллик ўсиш суръати 13,8 фоизни ташкил этган. Миллий валютадаги кўрсаткичларнинг сезиларли даражада ўсишини ўтган ўн икки ой давомида миллий валютанинг долларга нисбатан заифлашиши билан изоҳлаш мумкин.