Jyeb Bush AQSh prezidentligi uchun saylovlarda ishtirok etishini ma'lum qiladi

Florida shtatining sobiq gubernatori Jyeb Bush 15 iyun kuni AQSh prezidentligi uchun saylovga o‘z nomzodini ko‘rsatishini rasman ma'lum qiladi.

U o‘zining tvitteri orqali saylovoldi kampaniyasi logotipini namoyish qilgan.

CNN telekanaliga bergan intervyusida u o‘zidagi yetakchilik xususiyatlari saylovoldi kampaniyasida ish berishiga ishonishi haqida gapirgan.

Qayd etish joizki, respublikachi Jyeb Bush 2016 yilning noyabrida o‘tadigan saylovda g‘alaba qozonadigan bo‘lsa, bu AQSh tarixida bir oilaning 3 vakili mamlakatda prezidentlik qilishi bilan bog‘liq yagona holatga aylanadi.

Kichik Jorj Bushning ukasi Jyeb Bush 1953 yilda Texasda tug‘ilgan. 1980—1990 yillarda u Florida shtatida siyosiy karerasini olib borgan. 1999 yilda shtat gubernatoriga aylanib, 2007 yilgacha ushbu lavozimda ishlagan.