“O‘zbekiston havo yo‘llari” MAK 12 ta samolyot va 6 ta aviadvigatelni sotuvga qo‘ydi

“O‘zbekiston havo yo‘llari” MAK samolyot-motor parkini bir xillashtirish maqsadida 12 ta samolyot, 6 ta aviadvigatel va boshqa qurilmalarni sotuvga qo‘yishini e'lon qildi. Bugungi kunda ushbu texnikalar foydalanishdan chiqarilgan va maxsus joylarda saqlanmoqda.

Kompaniya matbuot xizmatining ma'lum qilishicha, 2 ta Yak-40 samolyoti (290 020 va 138 090 dollar), 4 ta Tu-154M (2 124 00 dollardan), 6 ta Il-76TD yuk samolyoti (2 701 770 dan 1 424 010 dollargacha narxda) sotuvga qo‘yilgan.

Bundan tashqari, turli samolyotlar modellari uchun mo‘ljallangan 6 ta aviadvigatel ham sotilmoqda.

“O‘zbekiston havo yo‘llari” MAK O‘zbekistonda to‘liq davlat nazoratida bo‘lgan yagona aviatashuvchi hisoblanadi. Kompaniyaning aviaparki 33 ta xorijiy samolyotga ega: 15 ta Boeing (10 ta 767-300 va 5 ta 757-200), uchta A-310, 10 ta A-320, uchta o‘rta magistraldagi RJ-85 va 2 ta A300-600F yuk samolyoti.

Kompaniya Yevropa, Amerika, Yaqin Sharq, Osiyoning 21 ta shahariga, MDHning 22 ta shahariga va mahalliy liniyalar bo‘yicha 11 ta yo‘nalishda reyslar amalga oshiradi.