1 oktabr kunidan O‘zbekiston aholisi va ulgurji iste'molchilarga beriladigan tabiiy gaz uchun Moliya vazirligi tomonidan tasdiqlangan yangi tariflar joriy qilinadi.
Bugundan Toshkent shahri aholisi uchun sovuq suv xizmatining yangi tariflari 8 foizga qimmatlashdi.
1 oktabrdan boshlab ko‘p qavatli turar-joy binolarida 1 metr kub suv uchun joriy 342 so‘mdan 370 so‘mga oshiriladi (8,1 foizga). Hisoblagichsiz uylarda esa bir kishi uchun bir oyga joriy 4185,64 so‘mdan 4516,88 so‘mga oshiriladi (7,9 foizga).
Shuningdek, Toshkentda issiq suv va isitish tizimi tariflari oshdi.
Issiq suvning kubometri hisoblagich o‘rnatilgan uylar uchun 3174.05 so‘mni (bungacha — 3015.87 so‘m, 5.2 foizlik o‘sish) va hisoblagich o‘rnatilmagan uylar uchun kishi boshiga oyiga 12395.4 so‘mni tashkil qiladi (bungacha — 11777.69).
O‘z navbatida O‘zbekistonda 1 oktabrdan elektr energiyasi to‘lovi qimmatlashadi.
Yangi tariflarga ko‘ra, aholiga beriladigan 1 kVt/s elektr energiyasi haqi 155 so‘mdan 167,40 so‘mgacha, elektr plitasi bilan ta'minlangan xonadonlar uchun 77,5 so‘mdan 83,7 so‘mgacha oshishi belgilangan.
Bundan oldin, O‘zbekistonda kommunal xizmatlar uchun narxlar shu yilning 15 may kunida oshirilgandi.
Shu tariqa, tabiiy gaz uchun tariflar yil boshidan buyon 15 foizga, sovuq suv ta'minoti uchun 19,4 foizga, isitish tizimlari uchun 27 foizga o‘sdi. Issiq suv uchun 17,3 foiz, elektr energiyasi uchun esa 16 foizlik o‘sish ko‘rsatkichlari qayd etildi.