Rossiyaning "Transaero" aviakompaniyasining ba'zi uchuvchilari Xitoy, Vetnam va Koreya aviakompaniyalarida ish izlashni boshlashdi. Bu haqda Sheremetevo parvoz tarkibi kasaba uyushmasi prezidenti Igor Deldyujov TASS axborot agentligiga ma'lum qildi.
Eslatib o‘tamiz, " Aeroflot" 2 sentabrda Transaeroning 75%+1 ta aksiyasini sotib olgan va aviakompaniya yo‘lovchilari oldida barcha majburiyatlarni bajarish javobgarligini o‘z zimmasiga olgan. Rossiya hukumati 1 oktabrda "Transaero" aviakompaniyasini bankrot deb tan olinishi haqida qaror chiqargan.
Deldyujovning aytishicha, ko‘plab uchuvchilar "Aeroflot"da ish o‘rni olishlariga ishonmayaptilar, shuning uchun xorijda, ayniqsa Janubi-Sharqiy Osiyo aviakompaniyalarida ish izlashga tushib ketdilar. Chunki bu yerda aviatashuvlar o‘sishi va yuqori ish haqi kuzatilmoqda.
Deldyujovning fikricha, "Aeroflot" rahbarining " Transaero"ning 5-6 ming xodimini qabul qilishi borasidagi rejalari piar-aksiya bo‘lib, undan maqsad xodimlarni tinchlantirishdir.
"Kompaniya buncha odamni ishga qabul qilishi dargumon. Ko‘pchilik uchuvchilar kredit, ipoteka qarzlariga egalar. Bunday ahvolda shturvalga qanday o‘tirib bo‘ladi? Shak-shubhasiz, ularni qandaydir yo‘l bilan tinchlantirish kerak edi", deb aytmoqda Deldyujov.