Namanganda tungi yo‘lto‘sarlar qo‘lga olindi

Joriy hafta IIV xodimlari tomonidan Namangan shahrida 2 nafar yo‘lto‘sar qo‘lga olindi. Bu haqda IIV matbuot xizmati xabar bermoqda.

Aytilishicha, Mamasoli ismli fuqaro kechki vaqtda shahar ko‘chalaridan birida ketayotganida 2 yigit uning yo‘lini to‘sib, qo‘lidagi sumkasini tortib olgan. Sumka ichida 1 mln so‘m pul va turli buyumlar bo‘lgan.

Fuqaro ichki ishlar boshqarmasiga murojaat qilganidan so‘ng yo‘lto‘sarlar tezlik bilan qo‘lga olingan. Qimmatliklar egasiga qaytarilgan.
Ayni paytda tergov ishlari davom etmoqda.