Shvetsiyada o‘smir qochqinlar uchun mo‘ljallangan boshpanada chiqqan janjalda 4 kishi jarohat oldi

Shvetsiyaning g‘arbida joylashgan Alingsos shaharchasida mamlakatga kattalarsiz, bir o‘zi kelgan o‘smir qochqinlar uchun mo‘ljallangan boshpanada chiqqan janjalda 4 kishi pichoq jarohatlari oldi.

Voqea joyiga politsiya va tez tibbiy yordam mashinasi kelgan. Jabrlanganlardan biri jiddiy jarohatlar bilan shifoxonaga olib ketilgan. Qolgan 3 kishi yengil jarohatlar olgan.

Politsiya xodimlari jinoyatchini qidirishmoqda. Ularning fikricha, janjal maishiy kelishmovchilik sabab chiqqan.

Shvetsiya migratsiya boshqarmasining prognoziga ko‘ra, shu yilning o‘zidayoq Shvetsiyaga 30 minggacha ota-onasiz bo‘lgan o‘smir qochqin kelishi mumkin. Ko‘pchilik mutaxassislar ularning asl yoshlari ular aytayotgandan farqlanishiga shubha qilishmoqda, chunki 18 yoshdan kichikroq muhojirlarga Shvetsiyada yashash uchun ruxsat olish osonroqdir.