O‘zbekistonlik taniqli xonanda Shahzoda “Sputnik Uzbekistan” agentligiga bergan intervyusida kelajakdagi rejalari bilan o‘rtoqlashdi.
Avvalambor, ikkinchi farzandining tug‘ilishi munosabati bilan uzoq vaqt tanaffus qilishga to‘g‘ri kelganini, shu tufayli Rossiyaga gastrol safarlari uyushtira olmaganini ta'kidlab o‘tgan xonanda yaqin kelajakda bu “ayriliq”ning o‘rnini to‘ldirishiga ishontirdi.
“Bandligim va yosh bolani tarbiyalayotganim tufayli hozircha aktyorlik sohasida hech narsa qilmadim, — tan oladi u. — Lekin o‘zbek rejissyori Rustam Sa'diyev suratga olgan “Baron” filmi uchun “Sirdoshim” nomli saundtrek yozdim. Ushbu filmda Rossiya va O‘zbekiston aktyorlari o‘ynagan. Trek ham yaqinda rotatsiyaga chiqadi”.
Shahzoda nega ko‘pdan buyon Rossiyaga bormayotganini tushuntirdi: “Bolam tug‘ilgani bois bir muddat Moskvaga va Rossiyaning boshqa shaharlariga bora olmaganimga qaramay, rus tilida qo‘shiq yozishda davom etdim. Odatda gastrolga bir kunlik chiqib bo‘lmaydi, oilamni uzoq muddatga tashlab keta olmas edim. Mening ikki yoshli bolam bor. Shu bois Rossiyaga borishimda biroz uzilish bo‘ldi”.
Shuningdek, u yaqinda bir yo‘la uchta albom chiqarish borasidagi rejalarini oshkor qildi: “Ijodga kelsak, to‘xtaganim yo‘q, biz shu vaqt davomida tinimsiz ishladik. Hozir bir yo‘la uchta albom tayyorlanmoqda: rus, o‘zbek va ingliz tillarida. Bu albomlar ustida baynalmilal jamoa ishlamoqda, uning tarkibida rumin, ukrain, o‘zbek mualliflari bor”.
“Shu kunlarda Rossiya musiqa kanallarida “Moye chudo” kompozitsiyasining premreasi bo‘lib o‘tadi. Bu sevgi, oila va baxt haqidagi qiziqarli hikoya yo‘g‘rilgan Yangi yil klipidir”, — so‘zida davom etdi ijodkor.
Shahzoda 2015 yilda qo‘lga kiritilgan yutuqlar hamda yaqin kelajakdagi rejalari haqida shunday dedi:
“Dekabrning boshida turkiyalik prodyuser, bastakor va xonanda Sinon Oqchil bilan birga ijro etganim Hirka qo‘shig‘ining xalqaro premerasi bo‘lib o‘tdi. Bu trek Germaniya, Turkiya, Qozog‘iston va O‘zbekistonda uzatilmoqda. Uyda esa men MY5 telekanalining Yangi yil s'yomkalarida ishtirok etdim, u yerda Vanessa Paradining Joele Taxi qo‘shig‘ini fransuz tilida ijro etdim. Toshkentliklar uchun boshqa syurprizlar ham bo‘ladi, ular Yangi yil bayrami kunlari bilib olishadi.
Shuningdek, 2016 yil boshida Akcent guruhi bilan birga yozilgan qo‘shiq premerasi bo‘lib o‘tadi. Biz guruh bolalari bilan birga ishlagandik, lekin o‘shanda ular saundprodyuserlar edi. Bu safar esa biz birga qo‘shiq aytamiz.
Oldindan ayta olamanki, bahorda Rossiyada konsert beraman. O‘zimning O‘zbekistondagi sevimli va sadoqatli muxlislarimni esa, an'anaga ko‘ra, mayning birato‘la yetti kuni mobaynida quvontira olaman, deb umid qilaman. Bir necha yillardan buyon may oyida Toshkentda yakkaxon konsertim o‘tadi, bu qilingan ishlar bo‘yicha yillik hisobotimdir”.