Xabaringiz bor, shu yilning 21 dekabr kuni poytaxtimizdagi “Istiqlol” san'at saroyida “E'tirof-2015” milliy tanlovining taqdirlash marosimi bo‘lib o‘tdi. An'anaviy o‘tkazib kelinayotgan mazkur tanlovda 23ta nominatsiya bo‘yicha san'at, sport va jurnalistika sohasining 2015 yildagi eng ilg‘or vakillari taqdirlandi. E'tirof etilganlar orasida aktrisa Yulduz Rajabova ham bor edi.
Sahnada “Yilning eng yaxshi ayol aktrisasi” nominatsiyasi bo‘yicha g‘olib sifatida Yulduz Rajabova nomi tilga olinganida uning o‘rniga mukofotni rejissyor Rustam Sa'diyev qabul qilib oldi. Tadbir boshlovchisi aktrisaning Xivada suratga olish jarayonida qatnashayotgani uchun marosimga kela olmaganini ma'lum qildi. Ammo...
Tadbir tamom bo‘lganidan so‘ng bir oz o‘tib marosimga taklif qilinmagan xonanda Lola Yo‘ldosheva o‘zining “Instagram”dagi sahifasiga bir suratni joylashtirdi. Unda to‘shak sahnasi tasvirlangan bo‘lib, markazda Yulduz Rajabova yotar edi! Unga qoldirilgan izohga e'tibor bering: “Ayni paytda “Istiqlol” san'at saroyida har yillik davlat mukofoti “E'tirof” bo‘lib o‘tmoqda. Biz esa yangi "Yaralangan Qanot" qo‘shig‘iga video tasvirga olayapmiz. Taklif etilganlar ro‘yxatida yo‘qman, lekin mening kadrimda “Yilning eng yaxshi aktrisasi” Yulduz Rajabova bor!..” Bu so‘zlarni har kim har xil tushunishi mumkin, ammo bizning nazdimizda Yulduz Rajabova faoliyatidagi ilk mukofotdan ko‘ra klipda suratga tushishni ma'qul ko‘rgan.
Keyingi kuni shov-shuv.uz sayti rahbari Jasur Hamroyev o‘zining “Feysbuk”dagi sahifasida Lolaning suratini joylab, unga quyidagicha izoh qoldirdi: “Mana, "E'tirof"ga hurmat! Davlat unga mukofot beraman, desa aktrisa tog‘da yuribdi! Kecha uni Xivada suratga olish ishlari bilan band, deya katta sahnada e'lon qilishgandi! Ommani aldashga nahot uyalishmadi?! Yulduz hayotidagi ilk katta mukofotni qabul qilib olishdek esda qolarli onlarni kecha boy berdi. Mensimay kelmaganiga yarasha klipda, yotoqxonada suratga tushayotganini bekitsa bo‘lardi! "O‘zbekkino"ning ko‘zi qayoqda?!”
Bugun, 23 dekabr tongida “Darakchi” nashri ham ushbu masalaga e'tibor qaratib, shu mavzuda Yulduz Rajabova bilan bo‘lib o‘tgan intervyuni e'lon qildi. Unda aktrisa marosimga borish haqida xabar berishganida shahardan tashqarida juda muhim (!) s'yomkada ekanini ma'lum qilgan. Uning aytishicha, ob-havo juda yomonligi sabab o‘z vaqtida yetib kela olmagan. “Qalin qor yoqqandi, traktor kelib, yo‘llarni tozalashini kutdik va shu bilan kechasi soat 1,5-2larda shaharga kirib keldik”, - deya javob bergan aktrisa. Qaysi filmda suratga tushgani haqidagi savolga esa “sir bo‘la qolsin”, deya javob bergan.
Ehtimol, bu katta shov-shuvlarga arziydigan masala emasdir. “E'tirof”ning ham nufuzi avvalgidek, avvalgi tanlovlarnikidek emas. Biroq bir yilda bir marta o‘tkazilib, san'at va madaniyat sohasida munosib faoliyat ko‘rsatgan nomzodlarga beriladigan eng muhim davlat tadbiriga bu darajada bee'tibor bo‘lmaslik kerak edi, deb hisoblaymiz.