O‘zbekistonning birinchi raqamli tennischi qizi Avstraliyadagi ITF turnirini tark etdi

O‘zbekistonning birinchi raqamli ayol tennischisi Nigina Abduraimova Avstraliyaning Pert shahrida davom etayotgan va sovrin jamg‘armasi 25 ming dollardan iborat turnirdagi ishtirokini yakunladi.

Musobaqada 6-raqam ostida tasniflangan Abduraimova ikkinchi davra uchrashuvida mezbonlar vakiliga imkoniyatni boy berib qo‘ydi. Bu haqda olamsport.com xabar berdi.

Abduraimova uch soatu bir daqiqa davom etgan bahsda avstraliyalik Jyeymi Furlisga 7:5, 3:6, 5:7 hisobida yutqazdi. Uchrashuv davomida Nigina 4ta, uning raqibi 2ta eys zarbani amalga oshirdi. O‘zbekiston vakili birinchi bosqichda xitoylik Jing-Jing Luni 4:6, 6:1, 6:2 hisobida mag‘lub etgandi. Asosiy to‘rga saralash bahslari orqali yetib kelgan mezbon tennischi ilk bosqichda yaponiyalik Kioka Okamuradan 6:1, 6:4 hisobida ustun kelgandi.

Ma'lumot uchun, Nigina Abduraimova 1994 yilda Toshkent shahrida tug‘ilgan. U ITF turkumidagi 11ta turnirda g‘alaba qilgan (uchtasi birinchi razryadda). U ayni vaqtda dunyo reytingida 221 o‘rinda turibdi.