O‘zbekistonlik jurnalist Davronbek Tojialiyev Facebook`dagi sahifasida fuqarolarni Toshkent shahriga vaqtincha ro‘yxatga olish tartiblari haqida o‘z mulohazalarini bildirdi. Jurnalist bu jarayonni boshdan oxirigacha o‘rganib, bu uchun kerak bo‘ladigan zaruriy hujjatlarni aniq, ravon va izohlari bilan tushuntirib berishga harakat qilgan.
“Tafsilot.uz'dan hujjatlar ro‘yxati bilan tanishib, "vaqtincha propiska" uchun qog‘ozlarni tayyorlab, Mirzo Ulug‘bek tumani IIBning Xorijga chiqish-kelish va fuqarolikni rasmiylashtirish bo‘limiga bordim. Ko‘pchilik navbat kutib turibdi. 54-chi bo‘lib yozildim. Ungacha “stol uslug”ga kirib, belgilangan ariza, uy egasi nomidan ariza va manzil varaqasini to‘ldirtirdim. Bu xizmat uchun 6000 so‘m to‘laysiz. Boshqa hujjatlar kseronusxasi uchun alohida haq to‘lanadi. “Stol uslug” xizmatchisi ishxonadan xat bor-yo‘qligini so‘radi. Mana, deb berdim. Uni ko‘rarkan, davlat idorasi bo‘lsa o‘tadi, xususiy firmalarnikini qabul qilishmayapti, dedi.
Tezda ishonch telefonlariga qo‘ng‘iroq qildim. Go‘shakni ko‘targan xizmatchidan "vaqtincha propiska" haqiqatan ham faqat davlat idoralari/korxonalari xizmatchilari uchun qabul qilinyaptimi, xususiy tashkilotlar uchun hali ochilmadimi, deb so‘radim. U buni tasdiqladi. Nodavlat korxonalar uchun ham tez orada ochiladi, hozir faqat davlat korxonalari ishchilari, talabalar, chet-el fuqarolarigina ro‘yxatga olinayotganini aytdi.
"Vaqtinchalik propiska" olish uchun quyidagi hujjatlar talab qilinar ekan:
1. IIV tomonidan belgilangan namunadagi ariza (Buni "stol uslug"da to‘ldirib berishadi).
2. Uy egasi nomidan ariza (Buni "stol uslug"da to‘ldirib berishadi).
3. Manzil varaqasi (Adresnyy listok pribytiya) (Buni "stol uslug"da to‘ldirib berishadi).
4. Fuqaroning pasporti va pasport nusxasi.
5. Kazarma, korabllar va kemalardan tashqarida yashaydigan xizmatchilar uchun O‘zbekiston Respublikasi Qurolli Kuchlari ofitserining yoki shartnoma bo‘yicha harbiy xizmatchining shaxsiy guvohnomasi.
6. Bolalarni ro‘yxatga qo‘yish uchun, agar ular 16 yoshga to‘lmagan bo‘lishsa, tug‘ilganlik haqidagi guvohnomalari hamda 3,5 x 4,5 hajmdagi 2 dona fotosurat.
7. Uyning kadastr hujjatlarining nusxasi.
8. Uyga egalik huquqini tasdiqlovchi hujjatlarning nusxasi (oldi-sotdi yoki hadya shartnomasi, Davlat orderi, meros guvohnomasi, hokimlik qarori va hokazo).
9. Uy egasining pasport nusxasi.
10. Davlat boji to‘langanligi haqidagi kvitansiya.
11. Notarius tomonidan tasdiqlangan ijara shartnomasi nusxasi.
12. Fuqaro yaqin qarindoshlarini (ota-ota farzandlarini, farzandlar ota-onasini, er xotinini, xotin erini) vaqtincha ro‘yxatga qo‘ydirayotgan bo‘lsa, yaqin qarindoshlikni tasdiqlovchi hujjatlar.
13. Davlat korxonasida ishlovchi ijaraga turuvchining ishxonasidan uni “vaqtincha propiska”ga qo‘yish to‘g‘risida rasmiy iltimosnoma.
Agar hujjatlar joyida bo‘lsa, 2-3 kun ichida qayd varag‘ini qo‘lingizga olishingiz mumkin ekan.
Jurnalist jarayonni o‘z boshidan o‘tkazib, mulohazalarni bayon qilar ekan, “Aholisining kattagina qismini viloyatliklar tashkil etuvchi Toshkent shahri uchun "Vaqtinchalik propiska" mavzusi dolzarb masala. Bu haqda to‘g‘ri, aniq va ishonchli ma'lumot berish davr talabi. Ichki ishlar vazirligining mvd.uz degan sayti bor. Nima uchun shu saytda bu haqda rasmiy xabar va hujjatlar ro‘yxati haligacha e'lon qilinmagan? Nima uchun fuqarolar asl manba turganda boshqa sayt va Facebook sahifalaridan yoki “stol uslug”da hujjatlar ro‘yxati chop etilgan qog‘ozchani 200 so‘mga sotib olib ma'lumot olishi kerak? Tekin va ishonchli ma'lumotni rasmiy saytda berilsa, o‘sha saytning nufuzi ham oshadi-ku axir. Ariza namunalarini saytda berilsa yoki yagona interaktiv davlat xizmatlari portalida amalga oshirsa bo‘ladi-ku!”, deya fikrlarini xulosalaydi.