Yaponiya quyosh elektrostansiyalaridan olinadigan energiya hajmini 10 yil ichida 23 barobar oshirdi

Yaponiya so‘nggi 10 yil ichida quyosh energiyasi hisobiga ishlovchi elektrostansiya va generatorlardan olinadigan elektr quvvati hajmini 23.3 karra oshirdi. Bu ma'lumotlar Tiba universitetining ma'ruzasida ta'kidlab o‘tildi.

2005 yilda ko‘rsatkich 1.23 million MVtni tashkil etgan bo‘lsa, o‘tgan yilning so‘ngiga kelib, u 28.6 million MVtgacha ko‘tarildi. Bu ko‘rsatkich esa 5.2 millionga yaqin xususiy uylarni elektr quvvati bilan ta'minlashga yetarlidir. Quyosh energiyasidan foydalanishdagi eng katta keskin o‘zgarish 2012 yilda tizimga imtiyozli tariflar joriy etilganida yuz bergan.

Shu bilan birga, Yaponiyada boshqa muqobil energiya manbalaridan elektr quvvatini olish infratuzilmalar rivoji esa u qadar tez suratda o‘smayapti. Misol uchun, so‘nggi 10 yil ichida shamol elektrostansiyalari miqdori faqatgina 2 barobarga oshdi. Bunga sabab esa, ularning qurilishi uchun katta ochiq va keng hududlar zarur.

“2050 yilga kelib issiqxona gaz chiqindilarini 80 foizga kamaytirish uchun Yaponiya asosiy e'tiborni muqobil energetika rivojiga qaratishi zarur. Bu faqat quyosh emas, balki elektrostansiyalariga tegishli bo‘lishi lozim”, - deb hisoblaydi Tiba universiteti professori Xidefumi Kurasaka.

Biroq, quyosh energetikasi rivojining ham o‘ziga yarasha kamchiliklari mavjud. Yaponiya Tabiatni muhofaza qilish vazirligining qayd etishicha, 2040 yilga kelib, hozirgi kundagi quyosh panelillari yaroqsiz holga kelib qoladi. Natijada 770 ming tonnaga yaqin qayta ishlash zarur bo‘lgan chiqindilar yig‘ilib qoladi. O‘tgan yili Yaponiyada foydalanilgan quyosh panelidan 2.4 ming tonna hajmidagi chiqindilar chiqarib tashlangan. 2030 yilga kelib esa bu ko‘rsatkich 10 karra oshadi, yana o‘n yildan so‘ng esa Yaponiyada tashlab yuborilgan barcha chiqindilarning 6 foizi quyosh panellariga to‘g‘ri keladi. Yapon hukumati bu chiqindilarni nima qilish haqida bir qarorga kelgani yo‘q.

Bundan tashqari, xizmat muddati 25 yildan oshmagani uchun mamlakatda quyosh panellarini qayta ishlash rivojlanmagani sababli muammo tobora chuqurlashib bormoqda.