Qalbaki Coca-Cola va Fanta ichimliklarini ishlab chiqargan soxta “tadbirkor”lar qo‘lga olindi

SVOJJDLQK departamentining Navoiy viloyat boshqarmasi va Qiziltepa tuman bo‘limi xodimlari tomonidan o‘tkazilgan tadbirda Samarqand viloyati Paxtachi tumani “Sultonobod” QFYda yashovchi fuqaro D.Eshqobilov (ism-familiyalar o‘zgartirilgan) 2015 yil 9 oktabrda Navoiy shahar “G‘alaba” shoh ko‘chasi 116-uyning oldida fuqaro T.Olimovga qo‘lbola usulda tayyorlangan yelim idishlardagi 180 dona Coca-Cola va 18 dona Fanta ichimliklarini 676,8 ming so‘mga sotgan vaqtda ushlanib, mahsulotlar ashyoviy dalil sifatida olingan. Bu haqda “Huquq” nashri yozmoqda.

Bundan tashqari, qo‘lbola uslubda tayyorlangan Coca-Cola hamda Fanta ichimliklarining ishlab chiqarish manbasini aniqlash maqsadida fuqaro D.Eshqobilovning yashash uyi ko‘zdan kechirilganda, bu yerdan qo‘lbola usulda tayyorlangan 1,5 litr hajmdagi 110 dona yelim idishlarda Coca-Cola ichimligi, 3 dona bo‘sh yelim idish va 5 dona ichimlikni qadoqlashga mo‘ljallangan polietilen qoplamasi topildi.

Mazkur holatlar yuzasidan JKning tegishli moddasi bilan jinoyat ishi qo‘zg‘atilib, qonunbuzar “tadbirkor”larga nisbatan sud o‘zining odilona hukmini e'lon qildi.