Buxoroda bo‘sh ish o‘rinlari yarmarkasi bo‘lib o‘tdi

Buxoroda “Ta'lim va mutaxassislik” ko‘rgazmasi hamda bo‘sh ish o‘rinlari yarmarkasi o‘tkazildi. Bu haqda “O‘zA” xabar bermoqda.

Mazkur ko‘rgazma viloyat hokimligi, o‘rta maxsus, kasb-hunar ta'limi, xalq ta'limi, mehnat boshqarmalari va boshqa tashkilotlar hamkorligida tashkil etildi.

Ko‘rgazmada Buxoro davlat universiteti, Buxoro muhandislik-texnologiya instituti, Buxoro davlat tibbiyot instituti, Toshkent irrigatsiya va melioratsiya hamda Toshkent davlat stomatologiya institutlarining Buxoro filiallari, shuningdek, viloyatdagi akademik litsey va kasb-hunar kollejlari o‘z ta'lim yo‘nalishlari, yoshlar uchun yaratilgan qulayliklarni ishlanma, videorolik, banner va tarqatma materiallar orqali namoyish qildi.

Ko‘rgazma doirasida tashkil etilgan mehnat yarmarkasida 142 korxona, tashkilot va muassasa 1 ming 500 ga yaqin bo‘sh ish o‘rni bilan ishtirok etdi. Yarmarkada 418 nafar bitiruvchiga ishga joylashish uchun yo‘llanma berildi.