Sobiq "Miss Turkiya" Erdo‘g‘anni haqoratlagani uchun shartli ravishda ozodlikdan mahrum etildi

2006 yilgi "Miss Turkiya" tanlovi g‘olibi Merve Buyuksarach Istanbul sudi tomonidan 14 oylik shartli qamoq jazosiga hukm qilindi. U mamlakat prezidenti Rajab Toyib Erdo‘g‘anni ijtimoiy tarmoqdagi sahifasida haqorat qilishda ayblangan.

Associated Press xabarida aytilishicha, yil boshida u instagramdagi posti uchun sudga chaqirilgandi. U o‘z postida Turkiya madhiyasiga parodiya qilib yozilgan satirik she'rni joylashtirgandi. She'rda davlat rahbarini haqoratlovchi so‘zlar bo‘lgan.

Ayblanuvchi bunday niyatda bo‘lmaganini qayta-qayta ta'kidlagan.

Buyuksarachning advokati sul qarori ustida apellyatsiya yozishi, Strasburgdagi Yevropa sudiga adolat so‘rab murojaat qilishini bildirgan.

Bundan oldinroq, Buyuksarachga Erdo‘g‘anni haqorat qilganlik uchun 2 yillik qamoq jazosi tahdid solayotgani haqida xabar berilgandi.

Turkiya qonunlariga ko‘ra, mamlakat prezidentini haqorat qilganlik uchun 4 yilgacha qamoq jazosi tayinlanishi mumkin.

2014 yildan buyon, ya'ni Erdo‘g‘an prezident bo‘lganidan beri u o‘z obro‘sini saqlash maqsadida 2 mingdan ortiq da'vo qilgan.

Kuzatuvchilarning fikricha, u shu orqali mamlakatda so‘z erkinligini cheklashga harakat qilib kelmoqda va muxoliflarining "unini o‘chirmoqda".