Amerika Kubogi: Messi va Suares jarohat tufayli guruhning ilk o‘yinlarini o‘tkazib yuboradi

Argentina terma jamoasi hujumchisi Lionel Messi jarohat tufayli Amerika Kubogining guruh bosqichida Chiliga qarshi o‘tkaziladigan birinchi o‘yinda ishtirok eta olmaydi.

U may oyi oxirida Hondurasga qarshi o‘rtoqlik uchrashuvida olgan jarohati bunga sabab bo‘ladi. Gulf News nashri xabariga ko‘ra, futbolchi 4 iyun kuni terma jamoa futbolchilaridan alohida holda mashg‘ulot o‘tagan. Uning 7 iyun kuni Chiliga qarshi o‘yinda maydonga tushishi katta so‘roq ostida.

Shuningdek, «Barselona»ning yana bir hujumchisi, urugvaylik Luis Suares jarohat tufayli terma jamoasining Meksikaga qarshi birinchi o‘yinida yordam bera olmaydi. U Ispaniya Kubogi finalida «Sevilya»ga qarshi o‘yinda jarohatlangandi. Uning tiklanishi uchun 3 hafta vaqt talab etilishi aytilgandi. U yana 1 haftada o‘yinlarga tayyor bo‘ladi. 

AQShda tashkil etilgan Amerika Kubogi o‘yinlari 26 iyunga qadar davom etadi. Turnirning 100 yilligi munosabati tashkil qilingan maxsus turnir ilk marta Janubiy Amerika qit'asidan tashqarida o‘tmoqda.