Buyuk Britaniya aholisi muhojirlar oqimi evaziga 65 mln kishidan oshib ketdi

Buyuk Britaniya aholisi immigratsiya darajasining keskin oshishi ortida birinchi marta 65 mln kishidan oshdi. Bu haqda Birlashgan Qirollik milliy statistika xizmati ma'lum qildi.   

Dastlabki ma'lumotlarga ko‘ra, mamlakat aholisi bir yil ichida  (2015 yil iyuniga ko‘ra) 513 ming kishiga oshdi: bunda 335,6 ming toza migratsiya (mamlakatga kelgan odamlar va undan ketgan odamlar orasidagi farq) va 171 ming esa tabiiy ko‘payish (tug‘ilganlar va vafot etganlar o‘rtasidagi farq) hisobiga oshdi. Shu tariqa, Buyuk Britaniyada istiqomat qiluvchi aholi soni 65,1 mln ga yetdi.

"Bu raqamlar Buyuk Britaniya aholisi yiliga taxminan yarim million kishiga ortayotganini tasdiqlaydi. Bunday sur'at saqlanib qoladigan bo‘lsa, aholi soni yaqin 20 yil ichida 10 mln ga ko‘payadi. Aholi soni oshgan sari bizning fuqarolarni ijtimoiy himoya qilish bo‘yicha imkoniyatlarimiz borgan sari kamayib boradi", deb Times gazetasida vaziyatga izoh berdi Migration Watch UK tashkiloti vitse-raisi Alp Mexmet.

Ayni vaqtda Buyuk Britaniyada Yevropa Ittifoqining 2,1 mln fuqarosi ishlaydi, bu Buyuk Britaniyaning Yevropa Ittifoqiga kirgan vaqtidan beri rekord ko‘rsatkichdir. Milliy statistika xizmatining ta'kidlashicha, o‘tgan yilning iyul-sentabrida Buyuk Britaniyaga rekord darajada polyaklar va Yevropa davlatlarining boshqa xalqlari vakillari keldi.   

Toza migratsiya ko‘rsatkichining nazoratsiz o‘sishi Buyuk Britaniyaning YeIda qolish taqdiri masalasi bo‘yicha referendum o‘tkazilishiga sabab bo‘ldi. Mamlakat bosh vaziri Devid Kemeron "YeI davlatlaridan migratsiyani qattiqqo‘llik bilan nazorat qilish choralarini qo‘llash" zarurligini talab qilmoqda. U toza migratsiya yiliga 300 ming kishini tashkil qilayotganini yo‘l qo‘yib bo‘lmaydigan holat deb atamoqda. Uning aytishicha, "harakatlanish erkinligi tamoyili YeIning yangi a'zolariga qo‘llanmasligi kerak".