Janubiy Koreya KXDRning Imjingan daryosi yuqori qismidagi to‘g‘onni ochib, suv toshqini yuzaga keltirishidan cho‘chimoqda. Bu haqida Janubiy Koreyaning Ryonxap agentligi xabar berdi.
"Bizning qurolli kuchlarimiz tegishli ma'lumotlarni yig‘ib, manfaatdor davlat idoralari bilan uzviy hamkorlikni davom ettirishmoqda", - deya Koreya Respublikasi Mudofaa vazirligi vakili Mun San Gyunning so‘zlarini keltiradi agentlik.
"Biz mahalliy hukumatlar bilan birga aholi xavfsizligiga oid majburiyatlarimizni bajaryapmiz, shuningdek suv resurslari bilan shug‘ullanuvchi kompaniyalarni bu borada ogohlantirdik", - deya izoh berdi mamlakatning Mudofaa vazirligi vakili. Uning so‘zlariga ko‘ra, Janubiy Koreya qurolli kuchlari zarurat tug‘ilsa, kerakli yordam ko‘rsatishga tayyor.
Joriy yilning may oyidan Xvangan to‘g‘onida KXDRni Janubiy Koreyadan ajratib turuvchi fuqarolik zonasidan 40 kilometr shimolda suvning yuqori darajasi qayd etilgan. To‘g‘on ochib yuborilsa, suv 40 daqiqa ichida Imjingan daryosining janubiy qismidagi Kunnam dambasiga yetib boradi.
Agentlikning ta'kidlashicha, 16-17 may kunlari Shimoliy Koreya Xvangan to‘g‘onidan qisman suv qo‘yib yuborgan va bu daryo sathining ko‘tarilishiga sabab bo‘lgan. Biroq, Janubiy Koreya Mudofaa vazirligi vakilining aytishicha, bu harakatlar KXDR tomonidan uyushtirilgan "suv zarbasi" sifatida baholanishi uchun yetarlicha asos bo‘la olmaydi.
foto:© RIA