Robokopni chaqirtirdingizmi? AQShda jinoyatchining robot yordamida bartaraf etilishi borasida bahs ketmoqda

AQShning Dallas shahrida politsiyachilar bir necha politsiyachini o‘ldirgan mergan bilan muzokaralar o‘tkazishga harakat qilishdi, biroq ular u bilan til topisha olishmadi. Shunda politsiyachilar jinoyatchini yo‘q qilish uchun portlovchi qurilma bilan jihozlangan robotdan foydalanishdi. Robot AQSh politsiyasi tarixida birinchi marotaba bunday tarzda qo‘llandi. Ushbu holat robotlardan bunday vaziyatlarda foydalanishga yo‘l qo‘yish mumkin-mumkinmasligi haqida bahs keltirib chiqardi.

Shahar politsiya boshqarmasi boshlig‘i Devid Braunning aytishicha, mergan bilan muzokaralar bir necha soat olib borilgan va besamar yakunlangan.

"Biz robot-sapyordan foydalanib, unga portlovchi qurilma o‘rnatib, uni mergan yashirinib olgan joyda harakatga keltirishdan bo‘lak vaziyatni hal qilishning boshqa chorasini topa olmadik", deb aytdi Braun. Uning aytishicha, vaziyatni hal qilishning boshqa variantlari politsiyachilar hayotini xavf ostiga qo‘yishi mumkin edi.

Robot mergan yashirinib o‘tirgan joyga kelganda politsiyachilar portlovchi qurilmani portlatishgan. Jinoyatchi voqea joyida halok bo‘lgan.

Engadget nashrining yozishicha, texaslik politsiyachilar tomonidan qo‘llangan robotning turini aniqlash qiyin bo‘lgan. U turli davlatlar huquq-tartibot muassasalari va armiyalari tomonidan keng foydalanuvchi TALON ko‘p maqsadli robotlar oilasiga tegishli bo‘lishi mumkin. Uning vazifalari modifikatsiyasiga bog‘liq bo‘ladi: robotning razvedka va kuzatuv olib boruvchi, bombalarni xavfsizlantiruvchi versiyalari mavjud. Shuningdek, robotning maxsus bo‘limlar uchun mo‘ljallangan sochma o‘q otuvchi qurol bilan qurollangan turi ham mavjud.