Ilon Mask Tesla 2016 yilning birinchi yarmida muvaffaqiyatsizlikka uchraganini tan oldi

Elektrokarlar ishlab chiqaruvchi Tesla Motors Inc kompaniyasi 2016 yilning birinchi yarmida kerakli miqdorda avtomobillar ishlab chiqara olmaganini tan oldi, deb xabar bermoqda Reuters axborot agentligi. 

Kompaniya hisobotiga ko‘ra, u 80 mingta rejalashtirilgan avtomobil o‘rniga 30 mingta avtomobil ishlab chiqara olgan. 2016 yilning 2-choragida mijozlarga 17 mingta avtomobil yetkazib berish maqsad qilingandi, biroq 14 mingtaga yaqin, jumladan 9764 ta Model S va 4638 ta Model X yetkazib berilgan.

"Yilning birinchi yarmida qiyin ahvolda edik. Iyunda biz bu holatdan qisman chiqib oldik va hozirda konveyer ishlamoqda, yetkazib beruvchilar esa bizga pand berishmayapti", deb aytdi kompaniya rahbari Ilon Mask.

2-chorak yakunlariga ko‘ra kompaniyaning sof ziyoni 293,2 mln dollarni tashkil qilgan. Shu bilan birga kompaniyaning tushumi 33 foizga oshib, 1,3 mlrd dollarga yetgan.  

Mask shuningdek yetkazib beruvchi kompaniyalar Model 3’ni ishlab chiqarishdagi vazifalarini eplay olmasalar, ular bilan shartnomalarni bekor qilib, kompaniyani qayta tashkillashtirishga tayyorligini aytgan. 

Avvalroq Mask avtomobillar va maishiy foydalanish uchun mo‘ljallangan akkumulyator batareyalarini ishlab chiqaruvchi dunyodagi eng katta zavod – Tesla Gigafactory’ni taqdim qilgandi.