"O‘zbekiston havo yo‘llari"ning Pulkovo aeroportida favqulodda qo‘ngan samolyoti 8 avgustda Farg‘onaga uchib ketadi

Sankt-Peterburgning Pulkovo aeroportiga favqulodda qo‘ngan "O‘zbekiston havo yo‘llari"ning Boeing-757 samolyoti 8 avgust ertalab Farg‘onaga uchib ketadi. Bu haqda aviakompaniyaga iqtibos keltirgan holda RIA “Novosti” axborot agentligi xabar bermoqda.   

"Samolyot kichik ta'mirlashdan keyin Moskva vaqti bilan 9.30 da Farg‘onaga uchib ketadi, yangi samolyot yuborishning hojati yo‘q", deb ma'lum qildi aviakompaniya vakili.

Avvalroq Farg‘onaga uchayotgan samolyot Pulkovo aeroportidan ko‘tarilgandan keyin dvigatellaridan biri ishlamay qolgan. Shundan keyin samolyot ortiga qaytishga majbur bo‘lgan. Samolyotda 180 kishi bo‘lgan. Samolyot dvigateli ishlamay qolgandan keyin yonilg‘isini sarflab yuborish uchun Peterburg ustida aylana bo‘ylab uchib yurgan va so‘ngra aeroportga qo‘ngan.