Yetti marta Olimpiada o‘yinlarida qatnashgan o‘zbekistonlik gimnastika ustasi Oksana Chusovitina sportdagi faoliyatini yakunlamaydi. Bu haqida u Rio-de-Janeyrodagi ishtirokidan keyin jurnalistlarga ma'lum qildi.
"Men sportdagi faoliyatimni yakunlamayman, mashq qilishda davom etaman", - deya ta'kidladi 41 yoshli gimnastikachi. Eslatib o‘tamiz, u turli yillarda O‘zbekiston, Germaniya hamda MDH (Birlashgan jamoa) terma jamoalari sharafini himoya qilgan.
2016 yildagi Olimpiya o‘yinlarida Chusovitina tayanch sakrash bo‘yicha yettinchi o‘rinni egalladi.