Bosh rolni reper Eminem ijro etgan «8 milya» filmi rejissyori Kertis Henson 71 yoshida vafot etdi. Bu haqda Associated Press xabar tarqatgan.
Los-Anjyeles shahri politsiyasi Hollivud hududidagi uyidan uning jasadini topgan.
Kertis Henson Los-Anjyelesda tug‘ilib o‘sgan. Maktabni tamomlagach, fotograf bo‘lib ishlagan. Keyin esa kino haqidagi jurnal muharririga aylangan. 1973 yili u "Shirin qotillik" filmiga ssenariy yozgan. Bu unga rejissyorlik ishidagi ilk qadam bo‘ladi.
O‘tgan asrning 90-yillarida Henson "Belanchakni aylantirayotgan qo‘l" va "Los-Anjyeles sirlari" nomli filmlarni ishladi. Ikkinchi filmi "Oskar"ga 9ta nominatsiya bo‘yicha da'vogarlik qiladi va faqat "eng yaxshi moslangan ssenariy" hamda "ikkinchi plandagi eng yaxshi aktrisa" yo‘nalishlarida g‘olib bo‘ladi.
U 2002 yilda ishlangan «8 milya» filmi orqali yana mashhurlashgandi.