Toshkentda o‘tkazilgan tezkor shaxmat bo‘yicha jahon shaxmat yulduzlari o‘rtasidagi xalqaro turnir yakunlandi

Toshkentda Sohibqiron Amir Temur tavalludining 680 yilligiga bag‘ishlab o‘tkazilgan tezkor shaxmat bo‘yicha jahon shaxmat yulduzlari o‘rtasidagi xalqaro turnir yakunlandi.

O‘zbekiston Respublikasi Madaniyat va sport ishlari vazirligi va O‘zbekiston shaxmat federatsiyasi hamkorligida tashkil etilgan musobaqada Rustam Qosimjonov, Shahriyor Mamedyarov (Ozarbayjon), Boris Gelfand (Isroil), Ruslan Ponomaryov (Ukraina) singari mahoratli shaxmatchilar aylanma tizimda g‘oliblik uchun o‘zaro bahslashdi.

Musobaqa doirasida taniqli grossmeysterlar tomonidan yosh shaxmatchilarga mahorat saboqlari o‘tkazildi.

Jahon shaxmat yulduzlari o‘rtasidagi xalqaro turnirning yakuniga ko‘ra, Shahriyor Mamedyarov 8 ochko bilan birinchi o‘rinni qo‘lga kiritdi.  Boris Gelfand 6 ochko bilan ikkinchi, Rustam Qosimjonov 5 ochko bilan uchinchi o‘rinni egalladi.