Barcha qurilmalardan yagona boshqaruv pulti yaratildi

San-frantsiskolik startapchilar "aqlli uy"ni boshqarishga imkon beruvchi Sevenhugs universal pultini yaratishdi. Ixcham gadjyet birinchi investorlariga 99 dollarga tushdi. Pult yaratuvchilari Kickstarter saytida pul yig‘ish kampaniyasining tugashiga 27 kun qolganda kerak bo‘lgandan 11 marta ko‘proq, ya'ni 565 ming dollar to‘play olishdi.   

Bugungi kunda smartfonni universal pultga aylantiruvchi uzatkichni sotib olish mumkin, biroq bu har doim ham qulay emas. Sevenhugs esa bu borada qiziqroq ishlangan bo‘lib, televizor (shu jumladan, turli kompaniyalarning "aqlli" modellarini), telepristavkalar (jumladan, Apple TV), pleyerlar, akustik tizimlar, yorug‘lik qurilmalari va boshqa jihozlarni boshqarishga imkon beradi.

Siz pultni kerakli qurilmaga yo‘naltirganingizda u avtomatik ravishda aniqlanadi. Bunda pultning IPS-ekrani faollashib, unda faol buyruqlar paydo bo‘ladi. Televizor uchun bu buyruqlar kanallar to‘plami va ovozni sozlash, yorug‘lanish uchun qurilmalar to‘plami va ularning yorug‘lik darajasi va boshqalar bo‘lishi mumkin. Bundan tashqari, pult ob-havo va Uber taksi-xizmati orqali chaqirtirilgan taksi kelgani haqida ma'lumot bera oladi.

Pult yordamida nafaqat bitta xonadagi qurilmalarni, balki boshqa xonalardagi texnikani ham boshqarish mumkin. Buning uchun shu xonalarda kirish nuqtalari o‘rnatib, ularni ulash kerak bo‘ladi. Pult Wi-Fi, Bluetooth va infraqizil kanal orqali buyruqlarni uzata oladi. 

Qurilma yaratuvchilarining aytishicha, pult 25 mingdan ko‘proq qurilmani boshqara oladi. U juda ixcham va yengil ishlangan, agar yo‘qolib qolsa ham uni pult bazasida joylashgan maxsus tugma orqali tez topib olish mumkin.