Janubiy Koreyada prezidentga qarshi tarixdagi eng katta namoyish bo‘lib o‘tdi

Janubiy Koreya shaharlari ko‘chalariga mamlakat prezidenti Pak Kin Xening iste'foga ketishini talab qilib, kamida 2,3 mln kishi chiqdi, deb xabar bermoqda Korea Herald nashri. Namoyish muxolif partiya parlamentga prezidentni impichment qilish taklifini kiritgandan bir necha soat keyin boshlangan.

Seuldagi namoyishning o‘zida 1,7 mln dan ko‘proq odam ishtirok etdi.

"Namoyish ishtirokchilari prezidentga bosimni kuchaytirish va uni o‘z lavozimini ko‘ngilli tarzda tark etishi maqsadida prezident qarorgohidan 200 metr naridan o‘tdilar", deyilmoqda xabarda.

Yana 620 ming kishi Janubiy Koreyaning yirikligi bo‘yicha 2-shahari – Pusan va Kvanju ko‘chalariga chiqdilar.

Bu namoyish mamlakatda prezident iste'fosi talab qilib o‘tkazilayotgan 6-namoyishdir. Mutaxassislarning hisob-kitoblari to‘g‘ri bo‘lsa, 4 dekabrdagi namoyish mamlakat tarixidagi eng yirigi bo‘lgan.  

Prezident impichmenti bo‘yicha ovoz berish 9 dekabrda bo‘lib o‘tadi. U bo‘yicha rezolyutsiyani 171 deputat, jumladan uch muxolif partiyadan barcha deputatlar va mustaqil deputatlar qo‘llab-quvvatlagan. Janubiy Koreya prezidentining iste'foga jo‘natilishi uchun 300 deputatdan 200 nafari bunga ovoz berishi kerak.

Pak Kin Xe o‘zining yaqin dugonasi Chxve Sun Silga soyavonlik qilganlikda ayblanmoqda. Chxve Sun Sil yirik korruptsion mojaroga aloqadorlikda ayblanmoqda.