Shavkat Mirziyoyev sog‘liqni saqlash sohasida uch viloyatga 2 oylik tajriba muddati belgiladi

Ma'lumki, 5 yanvar kuni O‘zbekiston Prezidenti Shavkat Mirziyoyev Sog‘liqni saqlash vazirligining yangi rahbariyati, markazlar rahbarlari hamda viloyat sog‘liqni saqlash boshqarma boshliqlari va boshqa bir qator mutasaddilar bilan uchrashdi. Unda aholini dori vositalari bilan talab darajasida ta'minlash bo‘yicha qator muammo va kamchiliklar borligiga ishora qilindi. 

Bugungi kunda farmatsevtika bozorining 75 foizini import dori vositalari tashkil etmoqda. Respublikamizda ishlab chiqarilayotgan dori vositalari aholi ehtiyojini umuman qoplamayapti. Dorixonalar qo‘yilgan talablarga javob bermaydi. Ularda sotilayotgan bir xil nomdagi dori vositalari narxi 2-3 barobar farq qiladi, lekin vazirlik bunga hech qanday chora ko‘rmaydi", - dedi davlatimiz rahbari. 

Shuningdek bir qator tibbiyot mutasaddilarining fikr-mulohazalari va takliflari tinglandi. Shavkat Mirziyoyev bundan keyin Toshkent, Sirdaryo va Jizzax viloyatlari ikki oylik tajribaga o‘tishini ma'lum qildi. Boshqa viloyatlarda ham bu borada ishlar olib borilishi, lekin shu uch viloyatda vaziyat juda yomonligi aytildi. 

"To‘g‘ri, ko‘p ish qilindi, lekin endi muhtaram Islom Abdug‘aniyevichning 25 yillik islohotlarini xalqqa yetkazish va manfaatdorlik hamda natijaviylik yuzasidan mutlaqo yangi tizim yaratish vaqti keldi. Odamlar bizdan juda ko‘p narsani, adolatli tibbiy xizmat yetkazishni kutyapti. Sizlarning burch va mas'uliyatingiz boshqa soha mutaxassislariga qaraganda o‘n karra yuqoriroq. Men sizlarning madaniyatingiz, vatanparvarligingiz, qasamyodingizga sodiq ekanligingizga umid qilaman", - deya o‘z so‘zlariga yakun yasadi Sh. Mirziyoyev.