Rustam Azimov Erdo‘g‘an bilan uchrashdi

Turkiya prezidenti Rajab Toyib Erdo‘g‘an O‘zbekiston bosh vaziri o‘rinbosari Rustam Azimovni qabul qildi. Bu haqda “Anadolu” agentligi xabar bermoqda.

Uchrashuv Istanbuldagi «Beylarbeyi» saroyida kechdi va ommaviy axborot vositalaridan yopiq holatda bir soat davom etdi. 

Uchrashuvda, shuningdek, Turkiya bosh vaziri o‘rinbosari Tug‘rul Turkesh, iqtisodiyot vaziri Nihat Zeybekchi va milliy mudofaa vaziri Fikri Ishiq qatnashdi.

Ma'lumot uchun, bugungi kunda O‘zbekiston va Turkiya o‘rtasidagi yillik savdo aylanmasi hajmi 1,2 milliard dollarni tashkil etadi.