O‘zbekistonlik sportchi masrestling bo‘yicha mutlaq jahon chempioniga aylandi

O‘zbekistonlik sportchilar 2-5 mart kunlari har yili AQShning Ohayo shtatida bo‘lib o‘tadigan mashhur Arnold Sports Festival sport musobaqasida ishtirok etishdi. 

Arnold Sports Festival AQShning eng nufuzli sport festivallaridan biri sanalib, shaxsan Arnold Shvartseneggerning o‘zi bu musobaqani bevosita qo‘llab-quvvatlab keladi. 

Bugun musobaqaning masrestling bo‘yicha jahon chempionati o‘tkazildi. Mazkur yo‘nalishda o‘zbekistonlik sportchi Olesya Gureyeva sharafli birinchi o‘rinni qo‘lga kiritdi va jahon chempioniga aylandi. 

Olesya Gureyeva masrestling bo‘yicha ko‘plab nufuzli musobaqalarda faxrli o‘rinlarni qo‘lga kiritgan. 2015 yil Qirg‘izistonda o‘tkazilgan Jahon kubogi sovrindori. Bundan tashqari, 2015 yil Rossiyada o‘tkazilgan Jahon kubogining yakuniy bosqichida faxrli birinchi o‘rinni qo‘lga kiritgan.