Xitoy: “Yevropa ittifoqining mamlakat po‘latiga nisbatan kiritgan yangi bojlariga javob qaytariladi”

Xitoy Yevropa ittifoqi ushbu mamlakat po‘latiga nisbatan yangi dempingga qarshi bojlar (qo‘shimcha import boji) kiritganidan so‘ng, o‘z ishlab chiqaruvchilari manfaatini himoya qilish maqsadida javob choralarini qabul qiladi. Bu haqda Xitoy tijorat vazirligining savdo himoyasi va surishtiruvlari departamenti direktori Van Xetszyun ma'lum qildi.

Avvalroq Yevropa komissiyasi YeI Xitoydan yangi quyilgan po‘lat importi uchun demping (chet el bozorlarida molni arzon sotish)ga qarshi bojlarni kiritgani haqida xabar berdi. XXR kompaniyalari tomonidan ishlab chiqarilgan mahsulotlar uchun turli bojlar kiritilgan: 18,1 foizdan 35,9 foizgacha. Ular besh yil amalda bo‘ladi va juma kunidan kuchga kiradi.

"Xitoy xitoylik ishlab chiqaruvchilarning qonuniy huquq va manfaatlarini himoya qilish uchun tegishli choralarni qabul qiladi", - deya aytib o‘tdi Van Xetszyun. Uning so‘zlariga ko‘ra, Xitoy YeI bilan aloqalarni mustahkamlash, ayni damda po‘lat quyish sanoati to‘qnash kelayotgan muammolarni hal qilish niyatida.

Uning ma'lum qilishicha, Yevropa ittifoqi adolatsiz va bema'ni usullarni qo‘llashda davom etmoqda, bu esa Xitoy korxonalari manfaatiga jiddiy zarar keltirmoqda. Van Xetszyunning ta'kidlashicha, Xitoy Yevropa ittifoqidan “xato harakatlarni tezroq tuzatishi” kutmoqda.