Toshkentda «o‘zbek–nemis innovatsion muloqoti» bo‘lib o‘tadi

2017 yil 10-12 may kunlari Toshkent shahridagi “O‘zekspomarkaz” Milliy ko‘rgazmalar majmuasida bo‘lib o‘tadigan X Respublika innovatsion g‘oyalar, texnologiyalar va loyihalar yarmarkasi doirasida III Toshkent xalqaro innovatsion forumi bo‘lib o‘tadi. Forumning asosiy vazifasi – dunyoda innovatsiya tizimlarining rivojlanish tendensiyalari, innovatsiya faoliyatining rivojlanish holati, muammolari va istiqbollarini tahlil qilish, milliy innovatsiya tizimini shakllantirishda turli omillarning o‘rnini aniqlash, innovatsion iqtisodiyot uchun kadrlar tayyorlash masalalarini muhokama qilish hamda dunyoda O‘zbekistonni innovatsion faolligi yuqori bo‘lgan hududga aylantirishdan iborat.

Bu yilgi Forum, asosan, O‘zbekiston-Germaniya davlatlarining innovatsiyalar sohasidagi hamkorliklari istiqbollariga bag‘ishlangan bo‘lib, «O‘zbek–Nemis innovatsion muloqoti – bilimlarga asoslangan jamiyat qurish kelajagi» deb nomlangan xalqaro anjuman bo‘lib o‘tadi.

Anjumanda ilmiy va innovatsion tadbirkorlikni qo‘llab-quvvatlash, korxonalar boshqaruvida innovatsion yondashuvlar, fan va ishlab chiqarish integratsiyasi hamda ilm-fan sohasida yuqori saviyadagi kadrlar tayyorlashni qo‘llab-quvvatlash bo‘yicha ilg‘or davlatlar, xususan Germaniya tajribasi, o‘zbek olimlarining yevropa ilmiy tashkilotlari bilan kadrlar tayyorlash sohasida xalqaro hamkorlik olib borish yo‘llari kabi masalalar muhokama etiladi.

Shuningdek, Forum doirasida O‘zbekiston-Rossiya va O‘zbekiston-Xitoy davlatlari o‘rtasidagi ilmiy-texnikaviy hamkorlik doirasida loyihalar shakllantirish yuzasidan “Xalqaro ilmiy-texnikaviy loyihalarda ishtirok etishning talab va qoidalari” deb nomlangan seminar va dunyodagi yetakchi xalqaro ilmiy-texnika axboroti bilan ta'minlovchi Web of Science, Springer, EBSCO kabi tashkilotlar vakillari ishtirokida “Ilmiy-texnik ma'lumotlar bazalaridan foydalanish” mavzusidagi taqdimotlar tashkil etiladi.

Forum ishida Germaniya, Bolgariya, Rossiya Federatsiyasi, Italiya, Xitoy, Janubiy Koreya, Yaponiya, Qozog‘iston, shuningdek, BMT, YuNeSKO, Jahon banki, O‘zbekistondagi Britaniya Kengashi ofisi, Erasmus+ Milliy ofisining yetakchi olimlari, mutaxassislari va ekspertlari ishtirok etishadi.

Tadbir yakunida Forumning tavsiyalarini ishlab chiqish bo‘yicha “Innovatsilar taraqqiyot yo‘li” deb nomlangan davra suhbati o‘tkaziladi.