«Bir makon – bir yo‘l» formatidagi navbatdagi forum 2019 yilda o‘tkaziladi

Xitoy ikkinchi «Bir makon – bir yo‘l» xalqaro iqtisodiy hamkorlik forumini 2019 yili o‘tkazishni rejalashtirmoqda. Bu haqda XXR raisi Si Jinping Pekinda bo‘lib o‘tgan «Bir makon – bir yo‘l» forumi yakunida matbuot anjumanida ma'lum qildi.

«Xitoy xalqaro hamkorlik bo‘yicha «Bir makon – bir yo‘l» ikkinchi forumini 2019 yili o‘tkazadi», — degan Xitoy rahbari.

Rossiya prezidenti Vladimir Putin ham forum yakunida chiqish qilgan.

«Janob Si Jinping keyingi uchrashuv 2019 yilda bo‘lib o‘tishini e'lon qildi. Bu forum qanday samara beradi, buni hayot ko‘rsatadi. Aytganlarimiz amalga oshadimi, yo‘qmi, biz shu ish bilan shug‘ullanamiz», degan Putin.

14–15 may kunlari Pekinda o‘tkazilgan forumda 29 mamlakat rahbari qatorida O‘zbekiston prezidenti Shavkat Mirziyoyev ham ishtirok etdi.