Toshkent shahrida “Qoradori – 2017” tadbiri o‘tkazilmoqda

Giyohvandlik vositalari yoki psixotrop moddalar bilan qonunga xilof ravishda muomala qilishga qarshi kurash borasida olib borilgan tadbirlar natijasida
yil boshidan buyon 514ta, 1-7 iyun kunlari oralig‘ida 34ta holat aniqlandi.

Shahar IIBBda tashkil etilgan brifingda ma'lum qilinishicha, Toshkent shahriga kirib kelish postlarida yil boshidan giyohvandlik vositalari bilan qonunga xilof ravishda muomala qilish jinoyatlari yil boshidan 88tani, hafta mobaynida 2tani tashkil etgan. 

Shuningdek, hafta davomida 1 kg 031 gramm, yil boshidan esa 25 kg 720 gramm giyohvandlik vositalari olingan. Xususan, 2017 yilning 2 iyun kuni shahar IIBB tomonidan o‘tkazilgan  “Qoradori – 2017” tadbiri davomida Sergeli tumani hududida muqaddam bezorilik jinoyati bilan sudlangan R.M. yonida og‘irligi 27,65 gramm “marixuana” giyohvandlik moddasini saqlab kelayotganligi aniqlangan. 

Mazkur holat yuzasidan Sergeli tumani IIB huzuridagi Tergov bo‘limi tomonidan Jinoyat Kodeksining 276-moddasi 1-qismi (giyohvandlik vositalarini o‘tkazish maqsadini ko‘zlamay, qonunga xilof ravishda saqlash) alomatlari bilan jinoyat ish qo‘zg‘atildi.

2017 yilning 4 iyun kuni ayni shu “Qoradori – 2017” tadbiri davomida Yunusobod tumani hududida F.T. o‘z uyi hovlisida, qonunga xilof ravishda, tarkibida giyohvandlik vositasi mavjud bo‘lgan 15 tup “nasha” o‘simligini ekib, yetishtirib kelayotganligi aniqlangan. 

Mazkur holat yuzasidan Yunusobod tumani IIB huzuridagi Tergov bo‘limi tomonidan Jinoyat Kodeksining 270-moddasi 1-qismi (taqiqlangan ekinlarni qonunga xilof ravishda ekish va yetishtirish) alomatlari bilan jinoyat ish qo‘zg‘atildi.

Hozirda, dastlabki tergov harakatlari davom ettirilib, Mirzayev va To‘laganovning boshqa jinoyatlarga aloqadorligi tekshirilmoqda.