Toshkent shahar adliya boshqarmasi fuqarolarning huquq va manfaatlarini himoya qilmoqda

2017 yil mamlakatimizda “Xalq bilan muloqot va inson manfaatlari yili”, deb e'lon qilinishi davlatimiz siyosatining bosh maqsadi insonparvarlik ekanligining yorqin ifodasi bo‘ldi. Qolaversa, bu xayrli tashabbus adliya organlari zimmasiga ham jiddiy mas'uliyat yuklaydi.

Shu ma'noda aytganda, Toshkent shahar adliya boshqarmasi ham xalq bilan yanada yaqinroq muloqot qilish, insonlarning huquq va erkinliklarini ta'minlash, ayniqsa, jismoniy va yuridik shaxslarning murojaatlarini to‘laqonli hal qilish masalalariga bugungi kun talabi asosida yangicha yondoshmoqda.

Xususan, 2017 yilning shu kuniga qadar adliya boshqarmasiga jismoniy va yuridik shaxslardan  370 ta ariza va shikoyatlar, Hukumat portali va Prezidentning Virtual qabulxonasi orqali 270 ta, “Ishonch telefoni”ga esa 20 ta murojaat kelib tushgan. Shundan 280 tasi o‘z vaqtida ko‘rib chiqilib, hal etilgan.

Masalan, fuqaro  V.Abdullayeva Toshkent shahar o‘rta maxsus, kasb-hunar ta'limi boshqarmasi tomonidan Toshkent davlat texnika universiteti qoshidagi 3-sonli akademik litsey direktor o‘rinbosari lavozimidan bo‘shatganligidan norozi bo‘lib va shu xususda amaliy  yordam ko‘rsatishni  so‘rab murojaat qilgan.

Mazkur murojaatni o‘rganish asosida kiritilgan taqdimnomaga ko‘ra, o‘rta maxsus, kasb-hunar ta'limi boshqarmasining 2016 yil 14 oktabrdagi 319-k sonli buyrug‘i bekor qilindi hamda V.Abdullayeva avvalgi lavozimiga tiklandi. Shuningdek, adliya boshqarmasi tomonidan fuqarolik ishlari bo‘yicha Yakkasaroy tumanlararo sudiga kiritilgan da'vo ariza asosida V. Abdullayeva foydasiga majburiy progul uchun kompensatsiya va yetkazilgan ma'naviy zarar summasi undirildi.

Shuningdek, fuqaro I.Xudoyqulova “Ishonch telefoni” orqali 100-sonli tayanch-harakati a'zolarida nuqsoni bo‘lgan bolalar uchun ixtisoslashtirilgan maktab-internat rahbariyati tomonidan homiladorlik va tug‘ish ta'tili bo‘yicha nafaqa pullari to‘lanmayotganligidan norozi bo‘lib qilgan murojaati ham o‘rganib chiqildi.

Ushbu murojaat yuzasidan kiritilgan taqdimnomaga asosan, fuqaro  I.Xudayqulovga nafaqa pullari to‘lab berildi va maktab-internatning bosh hisobchisi ma'muriy javobgarlikka tortilib, unga nisbatan eng kam ish haqining 10 baravari miqdorida jarima jazosi tayinlandi.

Bundan tashqari, fuqaro S.Matmurotovning Yashnobod tumani hokimining 2015 yil 3 noyabrdagi 529-sonli qarori va fuqarolik ishlari bo‘yicha Mirobod tumanlararo sudining hal qiluv qaroridan norozi bo‘lib yozgan arizasi ham o‘z vaqtida ko‘rib  chiqildi. O‘rganish natijasida tuman hokimi qarorini va fuqarolik ishlari bo‘yicha Mirobod tumanlaro sudining qarorini bekor qilish bo‘yicha fuqarolik ishlari bo‘yicha shahar sudining appelyatsiya instansiyasiga ariza (iltimosnoma) kiritildi. Sud qaroriga ko‘ra, tuman hokimining 2015 yil 3 noyabrdagi 529-sonli qarorining tegishli qismi va birinchi instansiya sudi hal qiluv qarori bekor qilindi.

Shu o‘rinda aytish lozimki, davlatimiz rahbarining Virtual qabulxonasi bugun jismoniy va yuridik shaxslarning ishonchli tayanchiga aylandi. Xususan, joriy yilning o‘tgan davrida boshqarmaning hukumat portali va Virtual qabulxona orqali kelib tushgan 270 ta murojaat o‘z yechimini topgan.

Yana shuni ta'kidlash joizki, adliya boshqarmasi va shaharning turli xududlaridagi jismoniy va yuridik shaxslarning vakillari shaxsan boshqarma boshlig‘i, uning o‘rinbosarlari, bo‘linma xodimlari tomonidan qabul qilinmoqda. O‘tkazilayotgan qabullarda nafaqat jismoniy va yuridik shaxslarning murojaatlari hal etilayapti, balki ularga qonunchilikdagi yangiliklarning mazmun-mohiyati ham batafsil tushuntirib borilmoqda.

Qolaversa, aholining huquqiy ongi va huquqiy madaniyatini yuksaltirish maqsadida ommaviy axborot vositalari hamda turli tashkilot va idoralar bilan hamkorlikda huquqiy targ‘ibot ishlari amalga oshirilmoqda.

Masalan, Prezidentimizning 2017 yil 14 martdagi “Huquqbuzarlik profilaktikasi va jinoyatchilikka qarshi kurashish tizimini yanada takomillashtirish chora-tadbirlari to‘g‘risida”gi Qaroriga ko‘ra, haftaning har payshanba kuni "Huquqbuzarliklar profilaktikasi kuni" etib belgilanganligini inobatga olib va mazkur qaror ijrosini ta'minlash maqsadida joylarda, xususan, xalq ta'limi va o‘rta maxsus ta'limi muassasalarida huquqbuzarlik profilaktikasi bo‘yicha huquqiy targ‘ibot ishlari doimiy ravishda amalga oshirilmoqda.