Neymar «PSJ» bilan tuzadigan shartnoma shartlari aniq bo‘ldi

«Barselona» hujumchisi Neymar «PSJ» bilan tuzadigan shaxsiy shartnoma shartlari bo‘yicha kelishuvga erishdi. Bu haqda Sky Sports nashri xabar tarqatdi.

Manba bergan xabarga ko‘ra, parijliklar Braziliya terma jamoasi futbolchisi bilan 5 yilga mo‘ljallangan shartnoma tuzadi. Neymarning oyligi barcha soliqlarni chiqarib tashlaganda 575 ming yevrodan biroz ko‘proq (roppa rosa 30 million yevro yillik) bo‘ladi. 

Umuman olganda Neymarning «Pari Sen-Jyermen»ga o‘tishi uchun jamoa jami bo‘lib 500 million yevro mablag‘ sarflaydi. Bu summa futbolchining tovon puli, soliqlar, uning oyligi, agentlar uchun to‘lanadigan bonuslar va boshqa to‘lovlarni o‘z ichiga oladi.

Braziliyalik futbolchi mavsumoldi tayyorgarligidan biroz oldinroq «Barselona»ni tark etishga qaror qilib qo‘ygandi.

Eslatib o‘tamiz, oldinroq «PSJ» futbolchi uchun to‘lanadigan 222 million yevro tovon pulini moliyaviy feyr-pleyni chetlab o‘tish maqsadida klub xo‘jayiniga tegishli Qatardagi fond orqali to‘lashni rejalashtirmoqda. Shuningdek, qatarliklar Neymarni JCh-2022 elchisi qilib, unga o‘z shartnomasini sotib olishi uchun katta pul berishi mumkinligi ham oshkor bo‘lgandi.