Germaniyaning sobiq elchisi yo‘l harakati qoidalari, turizmdagi kamchiliklar va ortiqcha byurokratizm haqida

15 sentabr kuni o‘z missiyasiga yakun yasagan Germaniyaning O‘zbekistondagi elchisi Naytxart Xyofer-Vissing ommaviy axborot vositalari uchun matbuot anjumani tashkil etdi. Elchi matbuot anjumanida O‘zbekistondagi faoliyati va taassurotlari haqida o‘rtoqlashdi hamda jurnalistlarni qiziqtirgan savollarga javob berdi.

U mamlakatlar o‘rtasidagi hamkorlikni ijobiy baholadi va kelgusida savdo-iqtisodiy aloqalar yanada rivojlanishiga umid bildirdi. 

Naytxart Xyofer-Vissing shuningdek, anjuman davomida O‘zbekistonda ayrim sohalarda uchraydigan kamchiliklarga ham o‘z munosabatini bildirib o‘tdi. Uning fikricha, turizm sohasida sayyohlar oqimini oshirish uchun viza olish tartibini osonlashtirib, ortiqcha byurokratizm va sarsongarchiliklarga chek qo‘yish kerak. 

«Ayrim hollarda xorijdan tashrif buyurgan diplomatik vakillar belgilangan muddatda mamlakatni tark etolmay qolsa, ularga jarima solinib, uchib ketishiga ruxsat berilmaydi. Ba'zan bir soatga kechga qolinsa ham, uchish bekor qilinib, ortiqcha qog‘ozbozlik talab qilinadi. Fikrimcha, xorijdan ish yuzasi bo‘yicha kelgan diplomatik korpus vakillari, davlat idoralari xodimlari uchun bu masalada biroz yengillik yaratish kerak».

Elchining so‘zlariga ko‘ra, O‘zbekiston Osiyo mamlakatlari orasida katta turizm salohiyatiga ega davlat, biroq xorijlik sayyohlarni jalb etish uchun yangicha infratuzilmani ishlab chiqish kerak. O‘zga mamlakatda sayohat qilib yurgan inson odatiy hayot tarzini o‘zgartirishga majbur bo‘lmasligi, o‘zini erkin, qulay his etishi lozimligi ta'kidlandi. 

«Fikrimcha, O‘zbekistonda yo‘l-harakati qoidalarini qaytadan isloh qilish kerak. Ko‘pincha odamlar manzilga tez yetib borishga oshiqib, boshqalarga yo‘l berishmaydi. Natijada, katta tirbandliklar yuzaga keladi. Balki mashinalarda tez va tartibsiz harakatlanishga benzinning narxi arzonligi sababdir. Agarda elektromobillar ishlab chiqarilishi boshlansa, yuqoridagi muammoning ham oldini olishga yordam beradi. Buning uchun esa yangi infratuzilmalar kerak», dedi Germaniya elchisi.

Elchi so‘zi yakunida, yuqorida bildirilgan barcha fikrlarni tanqid emas, balki tavsiya, maslahat o‘rnida qabul qilinishini so‘radi. 

«O‘zbekistondan iliq xotiralar bilan qaytmoqdaman. Bu yerda odamlarning mehmondo‘st, bag‘rikeng, tinchliksevar ekani menda katta taassurot qoldirdi», deya qayd etdi Naytxart Xyofer-Vissing.

Naytxart Xyofer-Vissing  O‘zbekistonga elchi sifatida 2014 yilning yanvar oyida tashrif buyurgan bo‘lib, to‘rt yil ichida u diplomatik missiyasini a'lo darajada amalga oshirdi.