Korrupsiya qanchalik jirkanch, mamalakat taraqqiyotiga to‘g‘anoq bo‘luvchi eng kuchli illat ekanligi aksariyatga ma'lum. Ana shu illatga qarshi kurashda jurnalistlarning vazifasi nimalardan iborat, o‘rni qanday? Ommaviy axborot vositalari bu yo‘nalishda nimalar qila olishi mumkin?
Avvalo shuni ta'kidlash lozimki, dunyoning barcha mamlakatlarida u yoki bu tarzda korrupsiya namoyon bo‘lmoqda. Halqaro valyuta jamg‘armasining taqsimlovchi direktori Kristin Lagardning ma'lum qilishicha, har yilgi poralar qiymati 2 trln dollargacha. Ya'ni bu miqdor dunyo yalpi ichki mahsulotining 2 foizini tashkil qiladi. Korrupsiyalashgan sohalar qatorida birinchi navbatda davlat xaridlari, qurilish, jumladan, yo‘l qurilishi, sog‘liqni saqlash va ta'lim sohalari tilga olinmoqda.
Kuzatuvchilar korrupsiyaning iqtisodiy, ijtimoiy va ma'naviy zarari haqida so‘z yuritishadi. Ushbu illat jamiyatda ijtimoiy tengsizlikni kuchaytirishi, iqtisodiyotning bir tekisda rivojlanishiga to‘sqinlik qilishidan tashqari, aholining hokimiyatga, adolatga bo‘lgan ishonchini so‘ndiradi. Fuqarolar orasida befarqlik, loqaydlik kuchayishiga olib keladi.
Jamiyatimizda ko‘zga tashlanadigan turli illatlar, jumladan, korrupsiya haqida so‘z ketganda, ayrimlar «ahvolni yaxshilash uchun 50 hatto 100 yil kerak, bir nechta avlod almashishi lozim» degan fikrlarni o‘rtaga tashlashadi. Ammo ayrim davlatlar tajribasi bu muammoni nisbatan qisqa davr ichida yengish, to‘laligicha bo‘lmasa ham, keskin kamaytirish mumkinligini ko‘rsatmoqda. Buni Singapur, Indoneziya, Bolgariya, Polsha kabi qator davlatlar misolida ko‘rish mumkin.
Korrupsiyaga qarshi kurashda nafaqat davlat organlari, balki fuqarolik jamiyati institutlari, ommaviy axborot vositalari hamkorlikda harakat qilishlari qanchalik muhimligini halqaro tajriba ko‘rsatib turibdi. Bejiz respublikamizda joriy yilning boshida kuchga kirgan «Korrupsiyaga qarshi kurashish to‘g‘risida»gi Qonunda «Ommaviy axborot vositalarining korrupsiyaga qarshi kurashishda ishtirok etishi» degan alohida modda kiritilmagan.
Afsuski, hanuzgacha bizning OAV faqat MXX va IIV tomonidan aniqlangan korruptsion holatlar haqida habar tarqatish bilan cheklanib qolmoqda. Korrupsiyaga qarshi kurash vositalari sifatida xorijlik kasbdoshlarimiz jurnalist tekshiruvi olib borishadi, davlat organlari tarqatgan ma'lumotlarni, amaldorlarning chiqishlarini tahlil qilishadi, ularning ish haqi va boshqa daromadlari to‘g‘risida aholini xabardor qilib turishadi.
Bizda bu borada yuzaga kelgan vaziyatning asosiy sababi - jurnalistning o‘zini himoyasiz hisoblashida desak, xato bo‘lmaydi. Korrupsiyaga daxldor holatlarni ochib berish uchun jurnalist tekshiruvi olib borishning o‘zi bir mashaqqat. Gohida oddiy axborotni qo‘lga kiritish muammo bo‘lib turgan paytda, poraxo‘rlik, mansab vazifasini suiiste'mol qilganlik, yuqori vazifalarga tayinlashdagi oshna-og‘aynigarchilik kabilar to‘g‘risida ma'lumot olishning o‘zi bo‘ladimi?!
