Maxsus bort Termizga qo‘nadi, Vladimirdagi fojiada halok bo‘lganlarning aksari surxondaryoliklar

6 oktabr tongida Rossiyaning Vladimir viloyatida avtobus va poyezd to‘qnashuvi oqibatida jarohatlangan o‘zbekistonliklarni va halok bo‘lganlarning jasadlarini O‘zbekistonga olib qaytadigan maxsus samolyot Surxondaryo viloyati Termiz shahridagi aeroportga qo‘nadi. Bu haqda «Kun» manbasi xabar berdi.

Ma'lum bo‘lishicha, yo‘l-transport hodisasiga uchragan avtobusda bo‘lganlarning aksar qismi Surxondaryo viloyatidan.

Bundan oldinroq fojiadan omon qolgan o‘zbekistonliklar ro‘yxati ma'lum bo‘lgandi.

Ayni vaqtda O‘zbekiston Tashqi ishlar vazirligi fojia oqibatida halok bo‘lganlarning shaxsiga aniqlik kiritish ustida ish olib bormoqda.

Eslatib o‘tamiz, 6 oktabr kuni Rossiyaning Vladimir viloyatida avtobus va poyezd to‘qnashuvi oqibatida avtobusda bo‘lgan 56 nafar o‘zbekistonlikdan 15 nafari halok bo‘lgan.

O‘zbekistonlik shifokorlar jarohatlanganlarga yordam ko‘rsatish uchun Rossiyaga uchib ketgan.