So‘x va Shohimardonga o‘tishda chegaradagi vaziyat qanday yechim topdi?

Bugun, 6 oktabr kuni Xalqaro press-klubning navbatdagi sessiyasi Oliy Majlisi Senatining o‘n ikkinchi yalpi majlisiga bag‘ishlandi. Anjumanda ishtirok etgan Kun.uz muxbiri Qirg‘iziston bilan chegara munosabatlarida  So‘x va Shohimardon masalasi qanday yechim topganiga qiziqdi. 

Mazkur savolga Oliy Majlis Senati fan, ta'lim, madaniyat va sport masalalari qo‘mitasi raisi Zayniddin Nizomxo‘jayev javob berdi: 

«Davlatimiz rahbari 5-6 sentabr kunlari Qirg‘izistonga qilgan tashrifi chog‘ida o‘zaro hamkorlik va chegara masalalari bo‘yicha shartnomalar imzolandi. Oliy Majlis Senatining o‘n ikkinchi yalpi majlisida esa bu hujjat ratifikatsiya qilindi. Endilikda ikki davlat o‘rtasidagi kelishuvlarga binoan chegaradan o‘tish tartibi, rejimi 80 foizga soddalashtirildi. U tomondan ham, bu tomondan ham aholining kirib-chiqishi uchun bir qancha qulayliklar yaratildi. Bu o‘z navbatida qo‘shnichilik aloqalarini yaxshilashga va chegarada paydo bo‘luvchi muammolar oldini olishga hissa qo‘shadi».

Zayniddin Nizomxo‘jayevning ta'kidlashicha, ikki mamlakat o‘rtasida imzolangan hujjatlar natijasida  So‘x tumani va Shohimardonga o‘tishda chegarada paydo bo‘luvchi muammoli vaziyatlar o‘z joyida yechimini topadi. Bu esa ortiqcha to‘sqinliklar vujudga kelishini oldini oladi.