Alisher Shayxov Yelizaveta II ga ishonch yorliqlarini topshirdi

O‘zbekistonning Buyuk Britaniyadagi favqulodda va muxtor elchisi Alisher Shayxov qirolicha Yelizaveta II ga ishonch yorliqlarini topshirdi.

Bugun Britaniya monarxlari qarorgohi — Bukingem saroyida bir qator davlatlar elchilaridan ishonch yorliqlarini qabul qilib olish uchun tantanali marosim bo‘lib o‘tgan.

Uzoq yillar davomida O‘zbekiston Savdo-sanoat palatasiga rahbar bo‘lgan Alisher Shayxov joriy yilning iyul oyida O‘zbekistonning Buyuk Britaniyadagi elchisi etib tayinlangan edi.

Alisher Shayxov 1956 yilda tug‘ilgan bo‘lib, Toshkent davlat universitetining bitiruvchisi hisoblanadi (1979 yil). Mutaxassisligi bo‘yicha iqtisodchi, iqtisodiy fanlar nomzodi. U 11 yil davomida – 2006 yilning aprelidan joriy yilning 20 iyun sanasiga qadar O‘zbekiston Savdo-sanoat palatasiga raislik qilgan.