Amerikalik ayol 24 yil avval muzlatib qo‘yilgan homiladan farzand dunyoga keltirdi

AQShning Tennessi shtatida yashovchi ayol 24 yil probirkada saqlangan homiladan qiz farzand dunyoga keltirdi. Bu haqda CNN telekanali xabar bermoqda.  

Bu o‘ziga xos rekord natija bo‘ldi. Ta'kidlanishicha, avvalgi rekord 2010 yilda o‘rnatilgan, o‘shanda juftlik 20 yil probirkada saqlangan homiladan farzand ko‘ra olgan.

Telekanal ma'lumotlariga ko‘ra, Emma deb nomlangan qizcha 25 noyabrda Tina va Benjamin Gibsonlar oilasida dunyoga kelgan. 1992 yil 14 oktyabrdan beri muzlatilgan holda bo‘lgan homila maxsus jarayon yordamida ayolning bachadoniga kiritilgan.

Shifokor juftlikka homilaning yoshini aytganda ular hayrat bildirishgan. Tina Gibson unga homila kiritilganda 25 yoshda bo‘lgan. Bundan esa u o‘zi dunyoga keltirgan qizidan rasman bir yoshgagina kattaligi kelib chiqadi.

Juftlik Benjamin kasallik tufayli bepusht bo‘lgani sababli bu jarayonni o‘tkazishga qaror qilgan. 

Tina telekanal orqali u shunchaki farzand ko‘rishni juda xohlaganini aytgan. “Bu jahon rekordimi yoki yo‘qmi, menga farqi yo‘q”, deb aytgan baxtiyor ona.