O‘zgaruvchan qiyofalar

Bugungi kunda firibgarlik mulkka qarshi qaratilgan jinoyatlar ichida eng ko‘p tarqalayotganidir. Buni statistik ma'lumotlar tasdiqlaydi, deb yozmoqda “Postda” gazetasi.

“Afsungar”

Ushbu voqea “qahramon”i tomonidan ko‘rsatilgan “afsungarlik” ham kishini taajjubga soladi.

Endigina yigirma yoshga qadam qo‘ygan farg‘onalik S.Malika (ismlar o‘zgartirildi) “ulkan rejalar”ni ko‘zlagan holda Xorazmga tashrif buyurdi. U Urganch shahridagi “safari”ni O‘zbekiston ko‘chasida joylashgan do‘kon sotuvchisi Q.Dilorom bilan tanishuvdan boshladi. Xushmuomala, shirinso‘z “mehmon” o‘zaro suhbat chog‘ida tilla taqinchoqlarini arzon narxda sotmoqchi ekanini aytib o‘tadi. Buni eshitgan Dilorom taqinchoqlarni ko‘rsatishni iltimos qiladi. Nihoyatda nafis, bejirim ishlangan tilla buyumlarni ko‘rgan sotuvchi ayolning qiziqishi yanada ortadi. U darhol qo‘shni binoda faoliyat yuritayotgan zargardan maslahat so‘raydi. Tilla buyumlarni diqqat bilan ko‘zdan kechirgan zargar ular sof oltindan yasalganini aytadi.

Dilorom uch turdagi tilla taqinchoqlarni 6 million 500 ming so‘mga sotib oladi. Pulni sanab olayotgan Malika o‘zining afsungarlik “mahorati”ni ishga solib, xaridorga pulini qayta sanab berishini iltimos qiladi. Tilla buyumlarni stol ustiga qo‘ygan xaridor pulni qayta sanay boshlaydi. Bundan foydalangan Malika ularni soxtasiga almashtirib qo‘yadi...

Qalbaki taqinchoqlarni tanishlariga ko‘rsatgan Dilorom aldanganini biladi va ichki ishlar organiga xabar beradi.

Urganch shahar IIB xodimlari tomonidan olib borilgan tezkor surishtiruv ishlari natijasida “afsungar” firibgar ashyoviy dalillar bilan qo‘lga olindi. 

“Nafasi o‘tkir folbin”

O‘tgan yilning 9 iyun kuni Qashqadaryo viloyatining Shahrisabz tumanida yashovchi O.Erkinoy Gurlan tumanidagi Yangi asl mahallasida tilanchilik bilan shug‘ullanib yurib, shu mahallada yashovchi, 1950 yilda tug‘ilgan Sh.Abdullayevaning xonadoni eshigini qoqadi. Xonadon sohibasi ostonada turgan ayolni ko‘rib, uni ichkariga taklif qiladi. Bunday iltifotdan boshi osmonga yetgan “mehmon” ostona hatlaydi-yu, qo‘rquvdan seskanib tushadi.

- Ibi-i-i, dugonajon, - deydi u yoqasini ushlagancha, - uyingizda nimalar bo‘lyapti?

Xonadon sohibasi “bilmasam” degandek, yelka qisadi.

- Uyingizda duo bor. Agar u yo‘q qilinmasa, o‘g‘lingiz aroqxo‘r bo‘lib ketadi, keliningiz esa ko‘p o‘tmay o‘lib qoladi.

- Voy o‘lmasam! – qo‘rqib ketadi xonadon sohibasi. – Nima qilishim kerak?

- Duoning kuchini faqat tilla bilan qaytarish mumkin, - deydi folbin jiddiy ohangda.

- Folbinning gapi to‘g‘ri, - deydi qizi Nasiba onasining qulog‘iga shivirlagancha. – Keyingi paytda akam ko‘p ichadigan bo‘lib qolgan. Yangam esa bosh og‘rig‘idan aziyat chekyapti. Aytgan narsasini bering.

Xullas, ona va uning qizi quloqlaridagi narxi 1 million 200 ming so‘mlik ikki juft tilla zirakni Erkinoyning qo‘liga tutqazadi. Ayol bir nimalarni o‘qib, “kuf-suf”laydi-da, qog‘ozga o‘ralgan bir narsani xonadon sohibasining qo‘liga beradi.

- Bu tog‘ isirig‘i. Uni hamma xonalarga tutatib chiqing! – deydi va xonadonni tark etadi.

Bu voqeani qo‘shnilariga so‘zlab bergan ona va qiz o‘zlarining aldanib qolganligi anglab yetishadi. So‘ng mol achchig‘ida tuman ichki ishlar bo‘limiga qarab yugurishadi.

Tuman IIB xodimlari tomonidan olib borilgan tezkor surishtiruv ishlari natijasida firibgar ayol qo‘lga olindi.

“Najot farishtalari”

Toshkent tibbiyot akademiyasining Urganch filiali o‘qituvchisi I.M. o‘z mansab vakolatidan foydalanib, o‘tgan yilning 29 iyun kuni tanishi Z.Matrizayevaning qizini oliy hamshiralik ishi yo‘nalishi bo‘yicha o‘qishga kiritib berishni va'da qilib, undan 5 ming AQSh dollarini firibgarlik yo‘li bilan olayotgan paytida huquqni muhofaza qiluvchi organlar tomonidan ushlandi.

Bugungi kunda ba'zi fuqarolar o‘z farzandlarining bilimiga, qobiliyatiga ishonmasdan “najot farishtalari”ni izlay boshlashadi. Urganchlik B.Gulmira va I.Nargiza ana shunday hojatbaror kimsalarni rosa ikki oy izlashdi. Nihoyat, urganchlik S.Muhabbat hamda N.Gulchehrani topib, yordam berishlarini so‘rashdi, evaziga quruq qo‘ymasligini aytishdi.

“Anqov – olg‘irga ov”, deyishganidek, o‘z oyog‘i bilan kelgan bu sodda insonlar firibgarlarning “ishtahasi”ni ochib yubordi. Najot istab kelganlarning 8500 AQSh dollarini olib, ko‘zdan g‘oyib bo‘lishdi. Test imtihonlaridan o‘tolmagan jabrdiydalar aldanib qolganini anglab, ichki ishlar organlariga murojaat etishga majbur bo‘lishdi.