Bosh prokuror yangi o‘rinbosarlari tayinlandi

O‘zbekiston Respublikasi Bosh prokurorining yangi o‘rinbosarlari lavozimiga tayinlandi. Bu haqda Bosh prokuratura Axborot xizmati xabar beradi.

Ma'lum qilinishicha, O‘zbekiston Respublikasi Prezidenti Shavkat Mirziyoyevning 2018 yil 21 fevraldagi PF-5359-son Farmoniga asosan Saidlaziz Saidasilovich Saidkarimov O‘zbekiston Respublikasi Bosh prokurorining o‘rinbosari etib tayinlandi. U shu paytgacha Bosh prokuraturada boshqarma boshlig‘i sifatida faoliyat yuritib kelayotgandi.

Shuningdek, O‘zbekiston Respublikasi Prezidentining 2018 yil 21 fevraldagi PF-5358-son Farmoniga asosan Qoraqalpog‘iston Respublikasi prokurori lavozimida ishlab kelayotgan Erkabay Aminovich Tadjiyev O‘zbekiston Respublikasi Bosh prokurorining birinchi o‘rinbosari etib tayinlandi. U bundan avval ham ushbu mansabda faoliyat yuritgandi.

Eslatib o‘tamiz, bungacha Bosh prokuror o‘rinbosari lavozimida ishlab kelgan Murodjon Azimov Davlat Bojxona qo‘mitasi raisi sifatida ish boshlashi munosabati bilan vazifasidan ozod etilgandi.