Koreyaga yo‘l olayotgan o‘zbekistonlik ishchilar imijini oshirish uchun qanday ishlar qilinmoqda?

Koreya Respublikasi 16 mamlakatdan ishchi kuchini jalb qilib keladi. Chet ellardan qabul qilinadigan 57 000 ishchi o‘rindan O‘zbekistonga ajratilgan kvota miqdori - 3000. O‘zbekistonda esa "hoziroq Koreyaga ketishga tayyor" kishilar soni 200 mingdan ortiq... Shu mahalgacha Koreyaga imtihondan o‘tganlar 2710 kishini tashkil qiladi. Shu o‘rinda tabiiy savol tug‘iladi - nima uchun o‘zbekistonlik ishchilar Koreyada raqobatbardosh emas va umuman bu borada vazirlik tomonidan qanday ishlar olib borilmoqda? Bandlik va mehnat munosabatlari vazirligi hamda Tashqi migratsiya agentligi vakillari KUN.UZ'ga quyidagilarni ma'lum qilishdi:

"Bugungi kunda Toshkent va Samarqand shahridagi KOICA o‘quv markazlarida malakali mutaxassislar tayyorlayapmiz, til o‘rganish imkoni ham bor, bularning bari bepul. Bundan tashqari, Bekobod shahrida Migratsiya markazi tashkil qilinadi. Undan keyin Paxtaobod, Shahrixon, keyinchalik har bir viloyatdagi markaziy kollejlarda migratsiya markazlari tashkil qilinadi. Mavjud barcha muammolarni hal qilsak, keyinchalik kvota sonini oshirishimiz mumkin", - deydi Tashqi mehnat migratsiya agentligi rahbari.

Shuningdek, migratsiya agentligi vakillarining ma'lum qilishicha, fuqaro test sinovlaridan muvaffaqiyatli o‘tib, ularning ma'lumotlari nomzod sifatida baza (Koreya Respublikasi Inson resurslarini rivojlantirish xizmati tomonidan yuritiladi)ga kiritiladi. Koreyalik ish beruvchilar uning ichidan keraklisini tanlab oladi. Nomzodning ma'lumotlari ish beruvchiga ma'qul kelsagina, u bilan shartnoma tuziladi. Demak, fuqarolarning testdan o‘tishi uning ish bilan ta'minlanishini kafolatlamaydi. Zero ish beruvchi tanlamay qolsa, jarayon amalga oshmay qolishi mumkin. Ikki yildan keyin qayta test jarayonidan o‘tish imkoni mavjud. Test jarayonidan o‘tish uchun O‘zbekiston fuqarosi albatta koreys tilini bilish kerak.

Bundan avval o‘zbekistonlik ishchilar Koreya Respublikasida mamlakat imidjini tushirib yuborishgani  haqida KUN.UZ'da xabar berilgandi. Unda Koreya inson resurslari markazining O‘zbekistondagi vakolatxonasi rahbari Pak San Lu quyidagi turdagi shaxslar Koreya Respublikasida O‘zbekiston imidjiga salbiy ta'sir ko‘rsatayotgani haqida aytib o‘tgan:

•    Til bilmaydigan shaxslar;

•    Ko‘p ish o‘zgartiruvchi shaxslar;

•    Noqonuniy mehnat faoliyatini yurituvchilar.

Bundan tashqari, KUN.UZ muxbiri Bandlik va mehnat munosabatlari vazirligining Tashqi migratsiya agentligi va Koreya test markazi bilan hamkorlikda 2018 yil uchun chora-tadbirlar rejasi tuzilgan yoki yo‘qligi va uni omma e'tiboriga taqdim etish imkoni mavjud yoki yo‘qligiga qiziqdi. Ma'lum bo‘lishicha, hozircha bunday chora-tadbirlar rejasi yo‘q. Mutaxassislarning so‘zlariga ko‘ra, 27 fevral kuni O‘zbekistonga Koreya delegatsiyasi keladi, tomonlar barcha masalalarni muhokama qilgan holda, talab va takliflardan kelib chiqib, yaqin yillar uchun chora-tadbirlar rejasini tuzishadi va uni ommaviy axborot vositalari e'tiboriga taqdim etishadi. Shuningdek Tashqi mehnat migratsiya agentligi rahbariyati Koreyaning o‘zida reyestrga tushgan o‘zbekistonliklar sonini aniqlashtirib, KUN.UZ'ga xabar qilishga va'da berdi.