Bobomurod Abdullayev sudda ko‘rsatma berishni boshladi

O‘zbekiston Respublikasi konstitutsiyaviy tuzumini ag‘darish va qonuniy saylangan hukumatni qurolli yo‘l bilan ag‘darishga uringanlikda ayblanayotgan jurnalist Bobomurod Abdullayev sudda ko‘rsatma berishni boshladi. Bu haqda KUN.UZ muxbiri xabar berdi. 

«O‘ziga nisbatan ilgari surilayotgan ayblovlarni batamom inkor etgan Abdullayev sudda o‘zining qo‘lga olinish jarayoni, o‘ziga nisbatan qiynoqlar bo‘lganini batafsil hikoya qilmoqda. U rost so‘zlamoqda, aks holda Bobomurod bu qadar aniq, ikir-chikirigacha hikoya qila olmas edi», - dedi advokat S.Mayorov.

Uning aytishicha, Abdullayev va himoyachilari, garchi sud-tibbiy ekspertizasi qiynoqlar bo‘lganini tasdiqlamagan bo‘lsa-da, qiynoqlar bo‘lganini ta'kidlashda davom etishadi hamda  ko‘rsatma berish jarayonida barchasiga oydinlik kiritiladi. 

«Bobomurod ko‘rsatmalarida tergov ishida yozilganlaridan tubdan farq qiluvchi ko‘rsatmalar bermoqda. Masalan, jinoyat ishida Usmon Haqnazarov taxallusini 2012 yildan boshlab qo‘llay boshlaganini yozgan. Ammo Bobomurod bugungi sud majlisida bu taxallusni 2003 yildan beri qo‘llashini tasdiqladi», - dedi Abdullayev advokati.