Farg‘onaning Qo‘shtepasida eshak so‘yib sotgan qallob «tadbirkorlar» qo‘lga olindi

So‘nggi vaqtlarda bot-bot qulog‘imizga chalinayotgan eshak go‘shti voqealari endi Farg‘ona viloyatida ham mish-mishlarga sabab bo‘ldi. Farg‘onaliklar orasida tarqalgan duv-duv gaplar, afsuski, haqiqat bo‘lib chiqdi!» — deyiladi «O‘zbekiston 24» telekanalining reportajida.

Farg‘onada eshak so‘yib sotgan qallob «tadbirkorlar» qo‘lga olingan. Tezkor ma'lumotlarga asosan SVOJDLQK departamentining Farg‘ona viloyati Qo‘shtepa tumani xodimlari tomonidan o‘tkazilgan tezkor tadbir davomida «Qoraqushchi» MFY, Turon ko‘chasi 85-uy ko‘zdan kechirilgan.

Ozod Botirovning kushxonaga aylangan hovlisida sanitariya talablariga tamomila zid ravishda so‘yilib, qassobxonalarga iste'mol uchun jo‘natishga tayyor qilib qo‘yilgan ko‘p miqdordagi eshak go‘shti va ushbu uy hayvoni jasadlari topilgan.

Haromdan hazar qilmagan «tadbirkorlar» Ozod Botirov va uning hamtovoqlari Bahrom Zokirov hamda Oybek Mo‘ydinov bilan birgalikda 250–300 ming so‘mdan eshaklarni sotib olib, shu xonadonning o‘zida so‘yib, nimtalab, keyin esa sotishni yo‘lga qo‘yishgan.

So‘yilgan jonivor go‘shtni Oybek Mo‘ydinovning mashinasida umumiy ovqatlanish korxonalariga kilogrammini 25–30 ming so‘mdan tarqatib yurishgan.

Arzon go‘shtning orqasidan mo‘may daromad olishni maqsad qilgan Toshloq tumanidagi «Yagona» kafesi oshpazlari xo‘randalarga eshak go‘shtidan kabob va boshqa turli taomlarni tayyorlab berib, nomiga monand, hududda yagona bo‘lishgan. Bundaylar orasida Farg‘ona shahrida istiqomat qiluvchi Murodjon Turg‘unovning «Milliy taomlar» oshxonasi ham bor edi.

Shu o‘rinda bir narsani ta'kidlab o‘tish joiz: eshak go‘shti ko‘rinishi bilan ham, ta'm va hidi bilan ham mol va qo‘y go‘shtidan farq qiladi. Buni oshpazlar ham, oshxona va kafe biznesi bilan shug‘ullanadiganlar ham juda yaxshi bilishadi.

Afsuski, pul ko‘zini ko‘r qilgan vijdonsizlar eshak go‘shti nafaqat inson salomatligi uchun xavfli ekanligini, balki Islom dinida ham harom sanalishini bila turib, shunday jirkanch ishga qo‘l urganliklariga nima deysiz?

Sanitariya va gigiyena qoidalariga amal qilinmasdan so‘yilgan hayvon go‘shtlarini tashish, saqlash va iste'molga chiqarish holatlariga zudlik bilan chek qo‘yildi.

Shu o‘rinda o‘ylanasan, kishi. Oshpazlar-ku, mayli bunday halol kasbga haromni aralashtirib, o‘z vijdonini ham sotib yuboribdi, lekin qalloblik bilan insonlarni harom eshak go‘shti bilan boqib yurgan soxta «tadbirkorlar»ning kirdikorlarini nahotki qo‘ni-qo‘shnilar, mahalla faollari, hamqishloqlari bilmagan-eshitmagan bo‘lsa?

Biz qachon befarqlik va loqaydlik deya atalmish bunday illat va qusurlardan qutilamiz? Axir bizda eshak go‘shti hattoki itga ham berilmaydi-ku? Yoshu qari buni juda yaxshi biladi. Jonivor o‘lganida uni olib borib, chet joyga ko‘mib kelinadi.

Afsuski, O.Botirov, B.Zokirov, O.Mo‘ydinov kabi kimsalar it uyoqda tursin, o‘z hamyurtlariga eshak go‘shtini yedirib yuborishgani ularning aslida kim ekanliklarini ko‘rsatdi.

To‘g‘ri, ular albatta qonun oldida javob berishadi. Lekin harom luqmani odamlarga ravo ko‘rganlari uchun ular o‘z iymon-e'tiqodi, qolaversa Yaratganning oldida qanday javob berisharkan? Qiziq, bu kimsalarning o‘zlari va bola-chaqalari shu go‘shtdan yeb ko‘rishganmikan? Yeb ko‘rmagan bo‘lsa-da, shu yo‘l bilan topilgan harom pullari bilan oilasini boqqani aniq, — deya yakunlanadi «O‘zbekiston 24» telekanali reportaji.