Fransiyada terakt. Garovdagilarni qutqarish amaliyoti yakunlandi, 3 kishi halok bo‘ldi

Bugun Fransiya janubidagi Od departamenti Treb kommunasida noma'lum shaxs Super U nomli supermarketga bostirib kirib, odamlarni garovga olishi oqibatida 3 kishi halok bo‘ldi.

BFM TV telekanali xabariga ko‘ra, voqea joyiga yetib kelgan maxsus xizmatlar xodimlari shturm davomida hujum qiluvchi shaxsni yo‘q qilishgan.

Kommuna meri Erik Menassining aytishicha, qutqaruv amaliyoti davomida garovdagilarning ikki nafari halok bo‘ldi.

Shuningdek, hujum uyushtirishdan oldin terrorchi avtomobilini o‘g‘irlab qochgan shaxs ham o‘ldirib ketilgan.

Fransiya prezidenti Emmanuel Makron ushbu hodisani terakt deb atadi. Mamlakat ichki ishlar vaziri Jyerar Kolon voqea joyiga yetib keldi.

OAV xabariga ko‘ra, odamlarni garovga olgan shaxs 2015 yilning noyabrida sodir etilgan terakt tashkilotchiligida ayblangan, IShID vakili Saloh Abdusalomni ozod etishni talab qilgandi.

Saloh Abdusalom - Parijda 2015 yilning 13 noyabrida sodir etilgan qirg‘in (o‘shanda 130 nafardan ortiq kishi o‘ldirilgan, 350 nafardan ortiq kishi yaralangan) tashkilotchilaridan biri sifatida 2016 yil martida Bryusselda qo‘lga olingan va Fransiyaga ekstraditsiya qilingandi. U hamon sudni kutmoqda.